Վրաստանը մինչեւ տարեվերջ Եվրամիության հետ առանց վիզային ռեժիմի անցնելու հնարավորություն ունի: Այս մասին մայիսի 21-ին «Արեւելյան գործընկերության» գագաթաժողովից առաջ հայտարարել է Լիտվայի ԱԳ նախարար Լինաս Լինկյավիչուսը:
ՏԱՍՍ-ի փոխանցմամբ, Վրաստանի ԱԳ նախարար Թամարա Բերուչաշվիլին նշել է, որ «Արեւելյան գործընկերության» Ռիգայի գագաթաժողովի ամփոփիչ հռչակագրում հարկավոր է «նշել Վրաստանի հետ վիզային ռեժիմի ազատականացումից առաջ տեխնիկական խնդիրների ավարտի ժամկետները»: Նրա խոսքով, «Արեւելյան գործընկերության» գագաթաժողովը Վրաստանի եվրոպական ինտեգրման կարեւորագույն փուլերից է:
«Վիզային ռեժիմի ազատականացման գործողությունների ծրագրի իրականացման ընթացքում երկիրը միջազգային բարձրագույն չափանիշի է հասել: Վրաստանն այդ գործընթացի ավարտի լավ մշակված ծրագիր ունի, որն անհրաժեշտ է իրականացնել առաջիկա ամիսներին»,- ընդգծել է Բերուչաշվիլին:
