Այսօր՝ մայիսի 22-ին, համայնքների խոշորացման վերաբերյալ անցկացված տեղական հանրաքվեի ամփոփման օրն է: ԿԸՀ քարտուղար Արմեն Սմբատյանը NEWS.am-ի թղթակցի հետ զրույցում ասաց, որ տեղամասային հանձնաժողովները ամփոփելու են արդյունքները եւ դրանք ներկայացնեն ԿԸՀ-ին: Իսկ Կենտրոնական ընտրական հանձնաժողովն էլ այն կներկայացնի Կառավարությանը: Կառավարությունն է որոշելու՝ այդ արդյունքները բավարարում է օրենսդրական նախաձեռնություններով հանդես գալու համար, թե ոչ:
Նշենք, որ կառավարության՝ մարտի 19-ի նիստում որոշում էր կայացվել մայիսի 17-ին անցկացնել հանրաքվե մի քանի համայնքների՝ Դիլիջանի, Թումանյանի եւ Տաթեւի խոշորացման համար: Այսպես նախատեսվում է Թումանյան համայնքի խոշորացման արդյունքում միավորել Թումանյան, Մարց, Քարինջ, Լորուտ, Շամուտ, Աթան, Ահնիձոր համայնքները, բնակչությունը կլինի մոտ 4597 , կենտրոնը՝ Թումանյանը: Տաթեւ համայնքի խոշորացման արդյունքում միավորվում են Տաթեւը, Հալիձորը, Հարժիսը, Շինուհայրը, Սվարանցը, Խոտը, Տանձատափը, Քասունին, բնակչությունը՝ 5960, կենտրոնը կլինի Շինուհայրը, քանի որ այդտեղ ենթակառուցվածքները եւ բնակչությունը շատ է: Դիլիջան համայնքի միավորման արդյունքում կմիավորվեն Դիլիջանը, Հաղարծինը, Թեղուտը, Գոշը, Աղավնավանքը, Խաչարձանը, Հովքը, բնակչությունը 25576 կլինի, կենտրոնը՝ Դիլիջան:
Եթե Սյունիքի մարզում միանշանակ կողմ են քվեարկել համայնքների խոշորացմանը, ապա նույնը չի կարելի ասել Տավուշի եւ Լոռու մարզերի մասին: