Բրյուսելի փոխքաղաքապետը թուրքամետ ցուցարարներին չի թույլատրել շաբաթ բելգիական մայրաքաղաքի տարածքում երթ անցկացնել, սակայն Սհարբեկ քաղաքում ցույց կանցկացվի: Այս մասին գրում է բելգիական «Le Soir» պարբերականը:
Բելգիացի թուրքերի պլատֆորմի նախաձեռնած միջոցառումը, որը կապված է Հայոց ցեղասպանության շուրջ վիճաբանությունների հետ, Բրյուսելի տարածքում արգելվելու է: Այս մասին հայտարարել է փոխքաղաքապետ Իվան Մայորը: Իսկ Սհարբեկի փոխքաղաքապետն ընդգծել է, որ չի թույլատրել ցուցարարներին երթ անցկացնել, սակայն միջոցառումը, ամեն դեպքում, չի արգելվել: Բեռնար Կլերֆեն որոշել է «չթույլատրել, բայց հանդուրժող լինել» իր համայնքի տարածքում թուրքամետ ցույցի հանդեպ:
Նա նաեւ հավելել է, որ հասկանում է այն մարդկանց, որոնց կարող է շփոթեցնել նման միջոցառումը, սակայն նշել է, որ այլ որոշման հնարավորություն չունի, քանի որ, հակառակ դեպքում, «կխախտվի ազատ արտահայտման իրավունքի սկզբունքը»:
