Հայաստանում ԵՄ պատվիրակության ղեկավար, դեսպան Տրայան Հրիսթեան հավատում է, որ Ռիգայի գագաթնաժողովում ընդունված հռչակագիրը նոր փուլ է երկկողմ հարաբերությունների համար: Այս մասին NEWS.am-ին ասաց ԵՄ պատվիրակության ղեկավարը:
«4 օր առաջ ընդունված հռչակագիրը պետք է գործածել նախ եւ առաջ որպես բանակցությունների նոր օրինական գործիք, ինչպես նաեւ պետք է կյանքի կոչել հռչակագրի մեջ ընդգծված եւ ճիշտ սահմանված կետերը՝ տարածաշրջանում անվտանգության կարեւորման հարցում»,- ասաց Տրայան Հրիսթեան՝ նշելով, որ հռչակագիրը հավելյալ հնարավորություններ է ստեղծել Վիլնյուսում ստորագրված հռչակագրին:
Հիշեցնենք, որ 2015թ. մայիսի 21-22-ին Լատվայի մայրաքաղաքում կայացել է ԵՄ «Արեւելյան գործընկերության» չորրորդ գագաթնաժողովը, որի արդյունքում համատեղ հռչակագիր է ընդունվել, թեեւ գագաթաժողովի սկզբում մասնակիցների միջեւ տարաձայնություններ էին առաջացել Ղրիմի հարցով:
Մասնավորապես, Բելառուսն ու Հայաստանը հրաժարվել են համաձայնեցնել ամփոփիչ հռչակագիրը՝ Ղրիմի «ապօրինի բռնակցման» մասին դրույթի պատճառով: Իսկ Ադրբեջանը ձգձգել է փաստաթղթի ստորագրումը, դիվանագիտական աղբյուրների համաձայն, դրանում ղարաբաղյան հարցի շուրջ «անբավարար ուշադրության» պատճառով: