Մոսկվայի «Սպարտակի» բժշկական բաժնի պետ Միխայիլ Վարդապետովը NEWS.am-ի թղթակից Վերա Մարտիրոսյանի հետ զրույցում պատմել է Հայաստանի ազգային հավաքականի ֆուտբոլիստներ Արաս Օզբիլիզի եւ Յուրա Մովսիսյանի ապաքինման եւ Հայաստանի հավաքականի առաջիկա խաղին նրանց մասնակցության մասին:
«Արասը հարյուր տոկոսով պատրաստ է եւ կարող է մարզվել հավաքականի հետ առանց սահմանափակումների: Կխաղա նա, թե ոչ կորոշի մարզիչը: Ամեն դեպքում ես խոնարհվում եմ նրա առջեւ՝ երրորդ անգամ նույն ջիլի վնասումը վճիռ է: Մարդիկ հիմնականում դադարում են ֆուտբոլ խաղալ նման իրավիճակում: Միայն նրա բնավորությունն ու աշխատասիրությունը օգնեցին լիովին ապաքինվել, եւ, իհարկե, իտալացի վիրաբույժ Մարիաննիի հիանալի աշխատանքը:
Ինչ վերաբերում է Յուրային, այսօրվա դրությամբ նա ոտնաթաթի երրորդ նախագարշապարի ոսկորի հետ կապված խնդիրներ ունի: Հուսանք, որ ապաքինման համար բավական ժամանակ կա, եւ նա կհասցնի օգնել հավաքականին»,- ասաց Վարդապետովը:
Վերա Մարտիրոսյան/ Vera&Football
