Վարչական դատարանում երեկ՝ մայիսի 25-ին, կայացել է հերթական դատական նիստը «Հրազդան» տոնավաճառն ընդդեմ հարկային մարմինների գործով: Մեզ հայտնի դարձավ, որ երեկվա նիստին որեւէ զարգացում չի եղել, դեռեւս նյութերի հավաքման փուլն է: Հաջորդ դատական նիստը նշանակված է հուլիսի 7-ին: Դեռ հայտնի չէ՝ այդ նիստին վճիռ կհրապարակվի, թե ոչ:
Հիշեցնենք, որ, ԱԺ ՀՀԿ-ական պատգամավոր Հակոբ Հակոբյանին պատկանող «Երեւան գարեջուր» ընկերությանը տուգանել են 653 միլիոն դրամով, իսկ մեկ այլ ՀՀԿ-ական պատգամավոր՝ Աշոտ Աղաբաբյանին՝ «Բուռնաշին», պատկանող «Հրազդան» տոնավաճառը տուգանել են 60 միլիոն դրամով: Պատգամավորները համաձայն չէին այս տուգանքների հետ եւ հայտարարել էին, որ դա կվիճարկեն դատարանում: Հարցին, թե այս թեմայով զրուցել եք Ֆինանսների նախարար Գագիկ Խաչատրյանի հետ, Աշոտ Աղաբաբյանը մեզ հետ զրույցում ասել էր. «Իհարկե, դիմել եմ, սակայն չգիտես ինչու Գագիկ Խաչատրյանը կարծում է, որ այդ հարցով պետք է դիմել նախագահին, ես էլ չեմ կարծում, թե դա նախագահին դիմելու հարց է»: