Մենք ունենք հիմնական մոդել, որի մասին միշտ խոսել ենք, դա խորհրդարանական մոդելն է: Այս մասին, այսօր՝ մայիսի 26-ին, ԱԺ-ում լրագրողների հետ զրույցում նշել է Կառավարության աշխատակազմի ղեկավար-նախարար Դավիթ Հարությունյանը, ով նաեւ Սահմանադրական բարեփոխումների հանձնաժողովի անդամ է:
Դիտարկմանը, թե Սերժ Սարգսյանը մտահոգություն էր հայտնել խորհրդարանական կառավարման ձեւին անցնելու վերաբերյալ, արդյոք փարատվել են այդ մտահոգությունները, Հարությունյանը պատասխանել է. «Ասել, որ վերջնականապես փարատված են բոլոր մտահոգությունները՝ կարծում եմ ճիշտ չի լինի, այնուամենայնիվ, մենք ունենք հիմնական մոդել, որի մասին միշտ խոսել ենք, դա խորհրդարանական մոդելն է, սակայն ամենակարեւոր հարցը նա է, թե կհաջողվի՞ արդյոք պատշաճ հակակշիռները, զսպումները ապահովել, մյուս կողմից որոշումների կայացման հրատապությունը, օպերատիվությունը եւ ինչ լեգիտիմության աստիճան պետք է ունենա այն անձը կամ այն մարմինը, որը այդ որոշումներն է կայացնում»:
Դավիթ Հարությունյանը նշել է, որ վստահ չէ, որ բոլոր ուժերը կպաշտպանեն այդ մոդելը, իշխանությունները փորձում են աշխատել բոլոր ուժերի հետ եւ շուտով կսկսեն քաղաքական ուժերի հետ հանդիպումները:
Ինչ վերաբերում է հարցին, թե երբ սահմանադրական բարեփոխումների արդյունքում ծնված տարբերակը կդրվի հանրաքվեի, նա պատասխանել է. «Չէի ցանկանա նախապես ինչ-որ բան ասել, աշխատանքը ցույց կտա, Եզոպոսի պատմությունն է, կքայլենք կերեւա»:
