Պարալլելս Ֆիլմ կինոընկերության, ռեժիսոր Մարինե Զաքարյանի «ՏԱՏԻԿԻՍ ՎԱՐՍԵՐԸ» լիամետրաժ խաղարկային ֆիլմը ընդգրկվել է Բուխարեստում անցկացվող Film Teep Համատեղ Արտադրության և Կինոնախագծերի Զարգացման ծրագրի 13 հաղթող կինոնախագծերի ցանկում:
Film Teep-ը 5-օրյա ինտենսիվ թրեյնինգ-ծրագիր է, որն անցկացվում է Ռումինիայի ազգային կինոկենտրոնի ֆինանսավորմամբ, Եվրոպական Կինոփառատոնի (Ռումինիա), Մանհեյմի (Գերմանիա) և Թրիեստայի (Իտալիա) կինոփառատոններին կից անցկացվող Mannheim Meeting Place և When East Meets West գործարար պլատֆորմների աջակցությամբ: Film Teep-ի նպատակն է ստեղծել բարենպաստ միջավայր ընտրված կինոնախագծերի զարգացման, ֆինանսավորման և տարածման համար, նպաստել Արևելյան Եվրոպայում կինոմասնագիտական ցանցի ձևավորմանը, խթանել Եվրոմիության անդամ և ոչ անդամ երկրների կինոպրոֆեսիոնալների համագործակցությանը: Այս տարի Film Teep-ի ընտրական հանձնաժողովը ընտրել է 13 կինոնախագիծ, 10 երկրներից, որոնց թվում են Հայաստանը, Իրանը, ԱՄՆ, Ռումինիան, Վրաստանը, Ռուսաստանը, Մակեդոնիան, Լիտվան, Իտալիան և Թուրքիան: Ծրագիրն անցկացվելու է Հունիսի 23ից-29ը, Բուխարեստում:
Մարինե Զաքարյանի «ՏԱՏԻԿԻՍ ՎԱՐՍԵՐԸ» ֆիլմը 2005ին հիմնադրված Պարալլելս Ֆիլմ կինոընկերության 4րդ լիամետրաժ կինոնախագիծն է՝ ԽՃՃՎԱԾ ԶՈՒԳԱՀԵՌՆԵՐ (2009), ԿԻՍԱԼՈՒՍՆԻ ԾՈՎԱԾՈՑԸ (2014) և ԼՈՒՍԱՎՈՐ ՇՐՋԱՆ (նկարահանումների մեջ) ֆիլմերից հետո: Ֆիլմը` 1900ականներին Հայաստանի գյուղերից մեկում տեղի ունեցած, մի ընտանիքի պատմություն է, էպիկական դրամա, որի գործողությունները ձգվում են մոտ 3 տասնամյակ: Ֆիլմի հիմքում ռեժիսորի տատիկի հուշերն են: Ֆիլմը համատեղ արտադրություն է Բուլղարիայի և Ռումինիայի հետ: Սցենարի հեղինակներն են Մարինե Զաքարյանը և Հովհաննես Գալստյանը: Պրոդյուսերնեն են Րաֆֆի Նիզիբլյանը, Կարեն Ծատուրյանը և Հովհաննես Գալստյանը: Օպերատորը` Միհրան Ստեփանյանը: Ֆիլմի նկարահանումները սկսվելու են 2016ի գարնանը: Ֆիլմը էկրան կբարձրանա 2017ին:
«Երբ ես պատմում էի այս պատմությունը իմ ընկերներին, առաջին ազդեցությունը լինում էր զարմանքը` միթե այսպիսի կրքեր են ունեցել մեր մեծ տատերն ու պապերը այդ հին ժամանակներում: Կրքերն իսկապես հզոր են: Ես ուզում եմ ներկայացնել մեր նախնիններին ուժեղ և անպաշտպան, հնազանդ և ընդվզող, նրանց սերը, ցավը և կիրքը: Այս ֆիլմը պետք է փոխի մեր կարծրատիպերը նրանց մասին»... ասում է ֆիլմի ռեժիսորը: