Էլեկտրաէներգիայի թանկացման դեմ «Ոչ թալանին» նախաձեռնության կազմակերպած հավաք երթը այսօր՝ մայիսի 27-ին, ավարտվեց Ազատության հրապարակում, որտեղից մեկնարկել էր: Երթի մասնակիցների հետ մինչև Ազատության հրապարակ քայլեցին նաև ԱԺ պատգամավորներ Զարուհի Փոստանջյանը և Լևոն Զուրաբյանը: Ազատության հրապարակում հավաք-երթի մասնակիցները հայտարարեցին, որ հաջորդ երթը տեղի կունենա հունիսի 19-ին (ֆոտոռեպորտաժ):
Երթի ավարտին Ազատության հրապարակում «Ոչ թալանին» նախաձեռնությունը ներկայացրեց ռեփ ոճի երգ, որն արտահայտում է իրենց բողոքն ընդդեմ էլեկտրաէներգիայի թանկացման:
Նշենք, որ այսօր էլեկտրաէներգիայի թանկացման դեմ բողոքի ակցիաներ են անցկացվել նաեւ Հայաստանի մարզերում:
Հիշեցնենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը բարձրացնելու համար։ Ներկայումս սակագինը կազմում է 1 կՎտ-ի համար 41,85 դրամ ցերեկը, եւ 31,85 դրամ՝ գիշերը։ ՀԷՑ-ն առաջարկում է թանկացնել մինչեւ 58 եւ 48 դրամ համապատասխանաբար:
