Լեռնային Ղարաբաղի Հանրապետության վարչապետ Արայիկ Հարությունյանը չի ցանկանում մեկնաբանել Ադրբեջանի արտգործնախարար Էլմար Մամեդյարովի հայտարարությունը ԵՏՄ մտնելու հետ կապված:

«Ես ոչ մի կերպ նրա հայտարարությունը չեմ գնահատում, նրա հայտարարությունը անհույս եմ համարում»,-այս մասին այսօր՝ մայիսի 28-ին, լրագրողների հետ զրույցում ասաց ԼՂՀ վարչապետ Արայիկ Հարությունյանը:

Ինչ վերաբերում է ԼՂՀ անվտանգությանն ու ԼՂՀ-Հայաստան հարաբերություններին, վարչապետն ընդգծեց, որ բարձր է գնահատում դրանք:

Ավելի վաղ NEWS.am-ը հայտնել էր, որ Ադրբեջանի արտգործնախարար Էլմար Մամեդյարովը չէր բացառել, որ իր երկիրը կարող է միանալ ԵՏՄ-ին, սակայն ոչ շուտ, քան կլուծվի ղարաբաղյան հակամարտությունը։

«Հայաստանի կողմից օկուպացված տարածքները թույլ չեն տալիս Հայաստանի հետ նույն միության անդամ լինել։ Եթե Հայաստանը դուրս բերի իր զորքերը, եթե բացվեն սահմանները, եթե կարգավորվի իրավիճակը, եթե Հայաստանի եւ Ադրբեջանի միջեւ տնտեսական բաղադրիչ լինի, ով գիտի, թե ինչ կարող է կատարվել վաղը։ Ինչպես ասվում է, never say never, այսինքն՝ երբեք մի՛ ասա երբեք»,- հայտարարել էր Մամեդյարովը «Ռոսիա 24»-ին տված հարցազրույցի ժամանակ։