Հայաստանի ոստիկանապետ վլադիմիր Գասպարյանը համոզված է, որ Սյունիքի մարզպետ Սուրիկ Խաչատրյանի դեմ մահափորձը բեմադրված չի եղել : Այս մասին այսօր՝ մայիսի 28-ին Սարդարապատի հուշահամալիրում լրագրողներին ասաց ոստիկանապետը նշելով, որ մահափորձի դեպքով հարուցված քրեական գործով նախաքննություն է ընթանում եւ այս պահին ոչինչ ասել չի կարող:
Լրագրողների հարցին, թե ինչպե՞ս է հնարավոր, որ 20 կրակոց արձակվի եւ ոչ ոք չտուժի, ոստիկանապետը պատասխանեց, որ նման բան հնարավոր է:
Ավելի վաղ NEWS.am-ը հայտնել էր, որ Կապան-Գորիս ճանապարհին 2015թ. մայիսի 20-ին կրակել են Սյունիքի մարզպետ Սուրիկ Խաչատրյանի մեքենայի ուղղությամբ։ NEWS.am-ի տեղեկությունը հաստատել էր Սյունիքի մարզպետի խորհրդական Զարզանդ Նիկողոսյանը՝ հավելելով, որ տուժողներ չկան: Ժամեր անց Քննչական կոմիտեն մամուլի հաղորդագրություն էր տարածել՝ նշելով, որ ՀԿԳ քննչական գլխավոր վարչության վարույթում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի եւ 235-րդ հոդվածի 1-ին մասի հատկանիշներով:
