Որոշակի ռիսկ կա, որ ԵՄ «Արեւելյան գործընկերությունը» կբաժանվի երկրների միջեւ, որոնք ստորագրել են ասոցացման համաձայնագիրը եւ որոնք չեն ստորագրել՝ Հայաստանը, Ադրբեջանը եւ Բելառուսը։ Այս մասին NEWS.am-ի թղթակցի հետ զրույցում ասաց FRIDE եվրոպական վերլուծական կենտրոնի՝ Արեւելյան Եվրոպայի, Կովկասի եւ Կենտրոնական Ասիայի ծրագրի ղեկավար, իսպանացի վերլուծաբան Յոս Բունստրան։
Նրա խոսքով՝ ԵՄ «Արեւելյան գործընկերություն» ծրագիրը մի շարք դրական արդյունքներ է արձանագրել, սակայն բազմաթիվ մարտահրավերներ դեռեւս մնում են։ «Ահա նրանցից 4-ը։ Առաջին՝ այն ժամանակ, երբ Վրաստանի, Մոլդովայի եւ Ուկրաինայի հետ ասոցացման մասին համաձայնագրի ստորագրումը դրական երեւույթ է, ռիսկ կա, որ ԵՄ «Արեւելյան գործընկերությունը» կմասնատվի երկրների միջեւ, որոնք ստորագրել են ասոցացման համաձայնագիրը եւ որոնք չեն ստորագրել՝ Հայաստանը, Ադրբեջանը եւ Բելառուսը։ ԵՄ-ն պետք է երկկողմ հիմքով եը իր չափով ծրագրերի մեջ ներառի Հայաստանին եւ մյուսներին։ Ճկունությունը ձեռնտու է երկու կողմերին»,- ասաց Բունստրան։
Երկրորդ՝ ԵՄ-ին անհրաժեշտ է համոզել, որ ինքը կարող է կատարել իր խոստումները։ Երրորդ՝ ԵՄ-ն պետք է վերանայի իր բազմակողմանի մոտեցումը եւ ներգրավված լինի տարածաշրջանային նախագծերին միայն այն երկրների հետ, որոնք իրոք շահագրգռված են դրանում։ Ավելի քիչ խոսակցություններ եւ ավելի շատ կոնկրետ արդյունքներ։
Եվ վերջապես չորրորդ՝ ԵՄ-ն պետք է ավելի շատ աշխատի ԵՄ եւ «Արեւելյան գործընկերության» երկրների քաղաքացիական հասարակությունների հետ։ «ԵՄ-ն Արեւելյան Եվրոպայի երկրների հասարակությունների հետ մերձենալու կարիք ունի»,- ընդգծեց իսպանացի վերլուծաբանը՝ հավելելով, որ վիզային ռեժիմի պարզեցման գործընթացի արագացումը այդ առումով կարեւոր տարր է։
