Հաջորդ շաբաթ ՀՀԿ խմբակցությունը քննարկում կանցկացնի էլեկտրաէներգիայի սակագնի հարցով: Այս մասին, այսօր՝ մայիսի 29-ին, ԱԺ-ում լրագրողների հետ զրույցում նշել է ՀՀԿ խմբակցության ղեկավար Վահրամ Բաղդասարյանը: Նրա խոսքով քննարկմանը կհրավիրվեն էներգետիկայի համար պատասխանատու պետական գերատեսչությունների առաջին դեմքերը:
«Իհարկե, քննարկումը չի լինի միակողմանի: Մենք կներկայացնենք նաեւ մեր փաստարկները, կբանավիճենք, ինչու ոչ»,-ասել է Բաղդասարյանը:
Նրա կարծիքով, նման միջոցն ավելի լավ է, քան փողոցում բողոքի ակցիաներ անելը: «Դա չի նշանակում, որ էնեկտրաէներգիայի հարցը մեզ չի հետաքրքրում: Պարզապես անհանգստանալ չի նշանակում դուրս գալ փողոց եւ բղավել»,-հավելել է ՀՀԿ-ական պատգամավորը:
Նշենք, որ մայիսի 27-ին Երեւանի Ազատության հրապարակում մեծ հանրահավաք է տեղի ունեցել ընդդեմ էլեկտրաէներգիայի թանկացման: Ակցիան կազմակերպել էր «Ոչ թալանին» նախաձեռնությունը: Հանրահավաքից հետո երթ է տեղի ունեցել Երեւանի փողոցներով:
Հիշեցնենք, որ ներկայումս «Հայաստանի էլեկտրական ցանցեր» ընկերության կողմից բնակչության համար էլեկտրաէներգիայի սակագին է սահմանված 41,85 դրամ մեկ կվ/ժամի համար (ցերեկային) եւ 31,85 դրամ գիշերային ժամերի համար: ՀԷՑ-ն իր նոր հայտով առաջարկում է այդ սակագները բարձրացնել եւ հասցնել 58 եւ 48 դրամ համապատասխանաբար:
