ԱՄՆ նախագահ Բարաք Օբաման Թեքսասի նահանգը հայտարարել է աղետի գոտի՝ կապված չդադարող հորդառատ անձրեւների ու ջրհեղեղների հետ, որոնց հետեւանքով նահանգում 24 մարդ է մահացել: Այս մասին հաղորդում է «Ռեյթերսը»՝ վկայակոչելով Սպիտակ Տան հաղորդագրությունը:
Մի քանի օր շարունակվող ջրհեղեղի պատճառով մոտ 40 մարդ համարվում է անհետ կորած: Սպիտակ Տան հայտարարությունում ասվում է, որ աղետի գոտի հայտարարելուց հետո նահանգը միջոցներ կստանա նման նպատակների համար ստեղծված դաշնային հիմնադրամից: Այդ գումարները կուղղվեն աղետից տուժած բնակիչներին, բիզնես վնասներ կրած գործարարներին, ինչպես նաեւ տրանսպորտային հաղորդակցության ու էլեկտրականության մատակարարումների վերականգնմանը:
Աղետի հետեւանքով մոտ 2 հազար բնակիչներ լքել են իրենց տները, մոտ 80 հազար մարդ մնացել է առանց էլեկտրականության, ճանապարհների մի մասը փակ է:
