Հայաստանի եւ Եվրամիության միջեւ կնքված նոր փաստաթուղթը կլինի ոչ միայն քաղաքական, այլ նաեւ տնտեսական եւ հաշվի կառնի ԵՏՄ շրջանակներում Հայաստանի որոշ սահմանափակումները։ Այս մասին մայիսի 30-ին կայացած մամուլի ասուլիսի ժամանակ հայտարարեց «Ժառանգություն» խմբակցության ղեկավար Թեւան Պողոսյանը։

Նրա խոսքով՝ «Արեւելյան  գործընկերության» Ռիգայի գագաթնաժողովը Հայաստանի համար որոշակի դրական արդյունքներ գրանցեց։ «ԵՄ-ն հավատարիմ է մնացել «Արեւելյան  գործընկերության» անդամ յուրաքանչյուր պետության հետ անհատական մոտեցման քաղաքականությանը։ Հաշվի առնելով Հայաստանի ունեցած խնդիրները՝ նոր բանակցություններ սկսելու համար մանդատ տրամադրվեց»,- ասաց պատգամավորը։ Նա հույս հայտնեց, որ Հայաստանի եւ ԵՄ-ի միջեւ փաստաթուղթը կստորագրվի մինչեւ տարվա վերջ։

«Մենք ունենք փաստաթուղթ, որի շուրջ արդեն բանակցություններ են տարվում։ Եթե մենք պրագմատիկ լինենք, ապա միգուցե 1-2 ամսից կկարողանանք հանել այն կետերը, որոնք որոշակի սահմանափակումներ են պարունակում։ Չմոռանանք, որ Մաքսային միությանը անդամակցելուց հետո Հայաստանի պետական պաշտոնյաները բազմիցս հայտարարել էին, որ պատրաստ են ստորագրել ասոցացման քաղաքական հատվածը»,- ասաց Պողոսյանը։