Ըստ մաքսային վիճակագրական տվյալների`2010 թ. Հայաստանում ավելացել է հեռախոսների ներկրումը։ Եթե 2009 թ. 1-ին կիսամյակում Հայաստան ներմուծվել էր 124 հազ. հատ հեռախոսային ապարատ, ապա 2010 թ.՝ 440 հազ. հատ։ Սակայն բջջային հեռախոսների ներմուծմամբ եւ իրացմամբ զբաղվող ընկերությունների ներկայացուցիչները չեն հաստատում պետեկամուտների կոմիտեի հրապարակած թվերի իսկությունը։
NEWS.am- Ինովացիայի թղթակցի հետ հեռախոսազրույցում Հայաստան բջջային հեռախոսներ ներմուծող մոտ տասնյակից ավել ընկերությունների մեծ մասը չհաստատեց այն հանգամանքը, որ իրենց մոտ ավելացել է բջջայինների ներմուծումը։
Sony Ericsson-ի ներկայացուցչությունից ասացին, որ բջջային հեռախոսների ներմուծումը վերջին եռամսյակում աճել է 25 տոկոսով, այնինչ նախորդ եռամսյակում աճը եղել էր 30 տոկոս։
Nokia-ի պաշտոնական ներկայացուցչությունից հրաժարվեցին տեղեկություններ հաղորդել՝ պատճառաբանելով, որ դա առեւտրային գաղտնիք է։
Mobile Center-ից ասացին, որ բջջային հեռախոսների ներմուծման քանակների փոփոխություն չունեն։ Նույն պատասխանը տրվեց նաեւ Orange mobile-ի կողմից։ Սակայն նախորդ տարվա համեմատ 1,5 անգամ աճել է iphone-ի վաճառքը, իսկ նախորդ եռամսյակի համեմատ տարբերություն չկա։
Ներքին շուկայում բջջային հեռախոսների իրացմամբ զբաղվող մի շարք ընկերություններ չեն հաստատում, որ բջջային հեռախոսների վաճառքի աճ կա։ Նման պատասխաններ են ստացվել մասնավորապես «Ասկադ մոբայլից», «Տելեկոմից»։
Բջջային շուկայում մրցակցությունն այն աստիճան սրվել է, որ մի շարք խաղորդներ հեռախոսների վաճառակետերը վերածել են հագուստի խանութների։ Այդ բախտին են արժանացել մասնավորապես Richphone-ը, Aksiom-ը։