«Օֆշորի» գործով մեղադրական եզրակացությունը դեռ դատախազին չի ուղարկվել եւ չի հաստատվել, հետեւաբար՝ գործը դեռ դատարան չի ուղարկվել:
Այս մասին NEWS.am-ի թղթակցի հետ զրույցում ասաց գործով մեղադրյալ Աշոտ Սուքիասյանի փաստաբանը՝ Յուրիկ Խաչատրյանը:
Նա նշեց, որ ծանոթանում է գործի նյութերին: Հարցին, թե ինչ պաշտոնյաներ են հարցաքննվել գործի շրջանակներում, փաստաբանն ասաց, որ հարցաքննվել են այն ժամանակ Էկոնոմիկայի նախարար Ներսես Երիցյանը, Առևտրի և շուկաների կարգավորման վարչության պետ Գագիկ Քոչարյանը:
Փաստաբանն ասաց, որ հարցաքննված պաշտոնյանները արձանագրել են, որ նման ժողով եղել է, հնչել են գործարարների առաջարկներ, բայց դրանով կառավարությունը չի զբաղվել:
Գործի շրջանակներում նախկին վարչապետ, այժմ ԱՄՆ-ում ՀՀ արտակարգ եւ լիազոր դեսպան Տիգրան Սարգսյանը չի հարցաքննվել, փոխարենը հարցաքննվել է Արարատյան Հայրապետական թեմի առաջնորդ Նավասարդ արք. Կճոյանը: Նա իր ցուցմունքում նշել է, որ որեւէ կապ չունի այդ գործարքների հետ, Աշոտ Սուքիասյանը, որպես խաչի քավոր, ելումուտ է ունեցել իր կաբինետ, վերցրել է իր անձնագրի պատճենները եւ նմանակել ստորագրությունը: Յուրիկ Խաչատրյանն ասաց, որ հարցաքննված պաշտոնյանների հետ առերեսումներ չեն եղել, քանի որ ցուցմունքներում տարբերություններ չկային:
Փաստաբանը նշեց նաեւ, որ միակողմանի քննություն է արվել, ամեն ինչ արել են, որ երեք մեղսագրված արարքները մինչեւ վերջ դրվի իր պաշտպանյալի վրա եւ իրենց ներկայացրած որեւէ փաստաթուղթ, միջնորդություն հաշվի չեն առել: «Աշոտ Սուքիասյանը չպետք է լիներ մեղադրյալ, Փայլակ Հայրապետյանն է նրան առաջարկել իր գույքը դնել եւ գործ անել, մի տարի չանցած՝ բանկը սկսել է բռնագանձել նրա գույքը, վերջինս էլ Աշոտ Սուքիասյանին դատի է տվել, թե փողերս ուր է, նա էլ Աֆրիկայի գործընկերներին է դատի տվել, այսօր էլ հանքի տեխնիկայի վրա արգելանք կա: Իսկ եթե բանկը համբերեր, միասին աշխատեին, այդպես չէր լինի»,-ասաց փաստաբանը:
Հիշեցնենք, որ դեռ 2009թ. էկոնոմիկայի նախարարության շենքում նախարար Ներսես Երիցյանի մոտ ՀՀ այդ ժամանակ վարչապետ Տիգրան Սարգսյանի գլխավորությամբ հանդիպում-խորհրդակցություն էր կազմակերպվել 23 արդյունաբերական կազմակերպությունների ղեկավարների հետ, որի ժամանակ քննարկվել էր Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Իսկ այդ 100 միլիոնի վարկը պետք է բաժանվեր այդ 23 կազմակերպությունների միջեւ, որպեսզի դրանք սկսեին աշխատել։ Գործարար Փայլակ Հայրապետյանն առաջարկել էր գրավադրել իր 33 մլն դոլար արժողությամբ իր ամբողջ անշարժ գույքը եւ «Ամերիաբանկը»-ից ստացված մոտ 10 միլիոն դոլարը տվել Աշոտ Սուքիասյանին, որն էլ վերցնելով գումարը՝ հեռացել էր երկրից: 2014թ. փետրվարին Աշոտ Սուքիասյանին հայտնաբերել էին Վրաստանում: Հունիսի 19-ին՝ Վրաստանից Հայաստան արտահանձնվելուց անմիջապես հետո, Աշոտ Սուքիասյանը կալանավորվել էր:
