Իրան-Հայաստան երկաթուղին առաջին հերթին օդի ու ջրի պես անհրաժեշտ է Հայաստանին եւ ավելի շուտ՝ քաղաքական տեսանկյունից։ Այս մասին հունիսի 22-ին կայացած մամուլի ասուլիսի ժամանակ հայտարարեց իրանագետ Գոհար Իսկանդարյանը։
«Դա մեզ կփրկի, նոր շունչ կհաղորդի։ Սակայն տնտեսական տեսանկյունից երկաթուղին, գոնե առաջիկա տարիներին, չի արդարացնի իրեն։ Իրանը Հայաստանի ապրանքաշրջանառության ոլորտում 4-րդ տեղն է զբաղեցնում։ Բացի այդ, այսօր Իրանը հովանավորչական քաղաքականություն է իրականացնում, այսինքն՝ մեր ապրանքները դժվարությամբ են հայտնվում նրա շուկայում։ Սակայն քաղաքական տեսանկյունից երկաթուղին իրականում պետք է, որպեսզի Հայաստանը վերջնականապես դուրս դա փակուղուց եւ կախված չլինի միայն Վրաստանից։ Իրանը նույնպես մեզ մեսիջներ է հղում, որ երկաթուղին անհրաժեշտ է։ Իրանը կառուցելու է երկաթուղու միայն 80 կմ, իսկ Հայաստանը՝ 400, բայց մենք կմիանանք տրանսիրանական երկաթգծին, որի միջոցով Իրանի հյուսիսային մասը մեկ գծով կապվում է հարավին։ Դրա շնորհիվ մենք ոչ միայն դուրս կգանք Պարսից ծոց, այլ նաեւ կապ կհաստատենք Իրանի հարեւանների հետ»,- ընդգծեց Գոհար Իսկանդարյանը։
Նա նշեց, որ Իրանը շատ լավ է հասկանում, որ Հայաստանն ավելի շահագրգռված է այս հարցում, ուստի Երեւանը պետք է ֆինանսական միջոցներ գտնի երկաթուղու շինարարության համար։ «Ես շատ եմ կասկածում, որ Իրանը հենց այնպես ֆինանսական միջոցներ կհատկացնի ծրագրի համար, որը երկրի համար առաջնային չի համարվում։ Իհարկե, Հայաստանը, ի դեմս նախագահի, քայլեր ձեռնարկում է։ Եվ ես տպավորություն ունեմ, որ մեր ղեկավարությունը քաղաքական կամք ունի այդ ծրագրի իրագործման համար»,- նշեց իրանագետը՝ հավելելով, որ մնում է գումար հայթայթել դրա համար։