Հունիսի 24-ին Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսը Մայր Աթոռ Ս. Էջմիածնում հրաժեշտի հանդիպում ունեցավ Հայաստանում դիվանագիտական առաքելությունն ավարտող Գերմանիայի Դաշնային Հանրապետության արտակարգ եւ լիազոր դեսպան Ռայներ Մորելի հետ:
Հանդիպմանը Նորին Սրբությունը գոհունակությամբ անդրադարձավ Մայր Աթոռի եւ դեսպանատան միջեւ ձեւավորված սերտ կապերին, ինչպես նաեւ կարեւորեց դեսպանի` հայ-գերմանական հարաբերությունների ամրապնդմանն ուղղված ջանքերը:
Խոսելով Գերմանիայի Բունդեսթագի կողմից Հայոց ցեղասպանության ճանաչման խնդրի մասին` Ամենայն Հայոց Հայրապետը հույս հայտնեց, որ շարունակվող քննարկումները դրական հանգուցալուծում կունենան: Գարեգին Բ Վեհափառն ընդգծեց, որ Գերմանիայի կողմից Հայոց Ցեղասպանության ճանաչումն ու դատապարտումն օրինակ կծառայի այլ պետությունների եւ ժողովուրդների համար` նպաստելով նաեւ մարդկային կյանքում նման ողբերգությունների կանխարգելմանը:
Իր հերթին դեսպան Մորելը շնորհակալություն հայտնեց Հայոց Հովվապետին ջերմ վերաբերմունքի եւ համագործակցության համար:
