Չեխիան Հայաստանին լավ ընկեր եւ կարեւոր գործընկեր է համարում։ Այս մասին ՀՀ արտգործնախարար Էդվարդ Նալբանդյանի հետ համատեղ մամուլի ասուլիսի ժամանակ հայտարարեց Չեխիայի արտգործնախարար Լյուբոմիր Զաորալեկը։
«Շատ ուրախ եմ, որ երկկողմ հարաբերությունները ինտենսիվ կերպով զարգանում են»,- նշեց նախարարըւ։ Նրա խոսքով՝ տնտեսության, էներգետիկայի, վերականգնվող ռեսուրսների, գյուղատնտեսության, ճանապարհային, երկաթուղային շինարարության ոլորտներում երկու երկրները համագործակցության զարգացման մեծ ներուժ ունեն։ Նախարարը նշեց, որ շատ չեխական ընկերություններ պատրաստ են Հայաստանում նախագծեր իրականացնել։ Ընդհանուր առմամբ նախարարը գոհունակություն հայտնեց այն կապակցությամբ, որ Հայաստանը մտադիր է զարգացնել ԵՄ-ի հետ համագործակցությունը՝ անկախ ԵՏՄ անդամ լինելու հանգամանքից։ Այս առումով նախարարը բարձր է գնահատել Եվրոպային մերձենալու Հայաստանի ցանկությունը եւ համագործակցության համար նոր իրավական հիմք ստեղծելու ցանկությունը։
Չեխ նախարարը նաեւ բարձր է գնահատել Ռիգայի գագաթնաժողովի արդյունքը՝ ողջունելով Հայաստան-ԵՄ բանակցությունները։
Էդվարդ Նալբանդյանն իր հերթին նշել է, որ հանդիպման ժամանակ իրենք քննարկել են երկկողմ հարաբերությունները, պայմանագրա-իրավական բազան, քաղաքական երկխոսությունը, միջազգային կազմակերպություններում համագործակցելը։ Նախարարը փաստել է, որ երկու երկրների միջեւ հարաբերույոնները մնում են բարձր մակարդակի վրա։ Դրան հատկապես կնպաստի Հայաստանում Չեխիայի դեսպանատան բացումը, որի հանդիսավոր արարողությունը կկայանա երկու երկրների արտգործնախարարների ներկայությամբ։ Նալբանդյանը իր գործընկերոջը տեղյակ է պահել ԵԱՀԿ ՄԽ-ի եւ Հայաստանի կողմից հակամարտության կարգավորմանն ուղղված ջանքերի մասին։