Նախագահներ Սարգսյանն ու Ալիեւը պատերազմ չեն ուզում։ Այս մասին Turan գործակալությանը տված հարցազրույցի ժամանակ հայտարարել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը։
Հարցին, թե ինչ կլինի, եթե Բաքուն ամեն դեպքում որոշի պատերազմ սկսել, դիվանագետը պատասխանել է, որ դա վատագույն տարբերակը կլինի։ «Դա կհանգեցնի հակամարտության ծավալմանը եւ լարվածության աճին, ինչպես նաեւ կբերի այլ կողմերի միջամտության, ինչը կխախտի մեր միջնորդական առաքելությունը։ Ուստի մենք աշխատում ենք հասնել հրադադարի ռեժիմի պահպանմանը եւ խուսափել բռնությունից»,-նշել է նա։
Հարցին, թե երբ են կողմերը առավել մոտ եղել խնդրի կարգավորմանը՝ այսօր, թե 5 տարի առաջ, միջնորդը պատասխանեց, որ խաղաղ կարգավորման տարբերակներ բանակցային գործընթացի ողջ ընթացքում մի քանի անգամ հայտնվել են, սակայն ցավոք չեն օգտագործվել։ «Նոր հնարավորություն կա նաեւ հիմա, եւ այն պետք է օգտագործել։ Ես չեմ ուզում նվազեցնել առկա բարդությունները, բայց քաղաքական կամք դրսեւորելու դեպքում հակամարտությունը լուծելի է։ Դրա այլընտրանքը պատերազմն է, չեմ կարծում, որ երկու երկրների ժողովուրդները դա ցանկանում են։ Ես բավական շատ եմ շփվել նախագահներ Ալիեւի եւ Սարգսյանի հետ եւ կարող եմ ասել, որ նրանք պատերազմ չեն ցանկանում, այլ ուզում են հակամարտությունը լուծել խաղաղ ճանապարհով, ահա թե ինչու ենք մենք նրանց օգնում»,- ընդգծել է Ուորլիքը։
