Երեւանի տարբեր վարչական տարածքներից տարբեր վարչական իրավախախտումներ կատարելու համար հատուկ պահպանվող տարածք են տեղափոխվել տասնյակ տրանսպորտային միջոցներ: Այս մասին NEWS.am-ի թղթակցին հայտնեցին ոստիկանության լրատվական ծառայությունից:
Մեզ փոխանցեցին, որ դրանց վերաբերյալ կազմվում են համապատասխան վարչական իրավախախտման արձանագրություններ:
Ավելի վաղ հայտնել էինք, որ մոտ երկու տասնյակ անձինք եկել են Բաղրամյան պողոտա, մոտեցել ԱԺ պատգամավոր Նիկոլ Փաշինյանին եւ պատմել ապօրինության մասին Ըստ վարորդների, երեկ ուշ երեկոյից սկսած ոստիկանները փողոցից մեքենաներ են բռնել, տարել Կենտրոնականի, Արաբկիրի, Շենգավիթի կամ այլ բաժանմունքներ, ապա տեղափոխել են տուգանային հրապարակ։
Ըստ վարորդների, ոստիկանները իրենց չեն պարզաբանել, թե ինչ հիմքով են մեքենաները տարել տուգանային հրապարակ, ընդամենը ասել են, որ ի համերաշխություն նստացույցի մանսակիցների ազդանշաններ են տվել, խաթարել մարդկանց անդորրը, եւ Երեւանի ոստիկանապետ Աշոտ Կարապետյանը հրահանգել է բերման ենթարկել մեքենաները։ Վարորդները մի մասը նստացույցին չի մասնակցել, եղել են նաեւ մասնակցողներ։
Ըստ վարորդների, բաժիններ են տարվել մոտ 120 մեքենաներ, որոնցից 80-ը դեռ տուգանային հրապարակում են։