Ջրհեղեղի արդյունքում տուժած Թբիլիսիի կենդանաբանական այգու տարածքից դուրս են բերել ծանր տեխնիկան: Այս մասին հունիսի 28-ին հայտարարել է այգու տնօրեն Զուրաբ Գուրիելիձեն:
Նրա խոսքով, հիմա արդեն ազատավանդակները մաքրում են այգու աշխատակիցները: «Տեխնիկան դուրս է բերված, հարկավոր է մաքրել եւ կարգի բերել այգու տարածքը: Այստեղ արդեն ձեռքերով է պետք աշխատել: Ազատավանդակներում կենդանիների կան, այդ պատճառով այստեղ կաշխատեն մեր աշխատակիցները»,- Գուրիելիձեի խոսքերն է մեջբերում «Գրուզիա Օնլայն»-ը:
Հիշեցնենք, որ հունիսի 14-ի գիշերը Թբիլիսիի կենտրոնում ջրհեղեղ տեղի ունեցավ: Վերե գետը սրբեց քաղաքային կենդաբանական այգին եւ դրան հարակից Հերոսների հրապարակի տարածքը: Արդյունքում 19 մարդ զոհվեց, երեքը համարվում են անհետ կորած, ավելի քան 400 մարդ առանց տանիքի է մնացել:
Կենդանաբանական այգու բնակիչները փախան: Նրանց մի մասը զոհվեց, մյուս մի մասին հաջողվեց վերադարձնել: Մինչ օրս ոչինչ հայտնի չէ կորած վագրի մասին:
