Ղարաբաղյան հակամարտության հարցում Ֆրանսիայի դիրքորոշումը հստակ է եւ պարզ. անհրաժեշտ է խուսափել բռնության ցանկացած դրսեւորումից՝ ջանքեր գործադրելով այդ ուղղությամբ։ Այս մասին այսօր՝ հունիսի 29-ին, լրագրողների հետ հանդիպման ժամանակ, հայտարարել է ՀՀ-ում Ֆրանսիայի դեսպան Ժան Ֆրանսուա Շարպանտիեն՝ անդրադառնալով հայ-ադրբեջանական սահմանին մի քանի օր առաջ հրադադարի ռեժիմի խախտմանը, որի հետեւանքով հայ զինծառայող էր զոհվել։
«Բնականաբար մենք մեր ցավակցությունն ենք հայտնում զոհված զինծառայողի ընտանիքին։ Մենք քննադատում ենք բռնության ցանկացած դրսեւորում։ Դա չի նշանակում, որ կատարվածը եւ այդ խախտումները մեզ կստիպեն հրաժարվել մեր վարած քաղաքականությունից»,- նշեց դեսպանը։ Նրա խոսքով՝ Ֆրանսիայի դիրքորոշումը՝ որպես ԵԱՀԿ Մինսկի խմբի համանախագահի, հստակ է։ «Մենք կգործադրենք բոլոր ջանքերը բանակցային գործընթացին աջակցելու համար։ Կողմերին կոչ ենք անում հետեւողական լինել եւ ձեռնամուխ լինել հակամարտության կարգավորման լուծումներ փնտրելու գործին»,- հավելեց Շարպանտիեն։
Ինչպես ավելի վաղ տեղեկացրել էր NEWS.am-ը, հունիսի 26-ին՝ ժամը 18:30-ի սահմաններում, ադրբեջանական կողմը խախտել է հրադադարի ռեժիմը հայ-ադրբեջանական սահմանի Նախիջեւանի ուղղությամբ` հրաձգային տարբեր տրամաչափի զենքերից կրակ վարելով ՀՀ Սյունիքի մարզի Գորհայք բնակավայրի մոտ տեղակայված հայկական դիրքերի ուղղությամբ: ՀՀ զինված ուժերի դիրքապահ ստորաբաժանումների պատասխան գործողությունների արդյունքում հակառակորդի կրակակետերը լռեցվել են: Ստացված օպերատիվ տվյալների համաձայն, Նախիջեւանի առանձին համազորային բանակն ունի զոհեր եւ վիրավորներ: Դժբախտաբար, փոխհրաձգության ընթացքում մահացու հրազենային վիրավորում է ստացել նաեւ ՀՀ ԶՈՒ պայմանագրային զինծառայող, շարքային Արման Մայիսի Եփրմյանը: