Այն, որ Կրեմլը կռացավ եւ Պերմյակովի գործը հանձնեց մեզ, դա երիտասարդների ճնշման արդյունք է: Այս մասին, այսօր՝ հունիսի 29-ին, լրագրողների հետ հանդիպման ժամանակ նշել է Հանրային խորհրդի անդամ Արշակ Սադոյանը՝ անդրադառնալով Էլեկտրաէներգիայի սակագնի բարձրացման դեմ բողոքի ակցիային եւ դրա արդյունքներին:
Անդրադառնալով «Հայաստանի էլեկտրական ցանցեր» ընկերության գործունեությանը, Սադոյանն դա խայտառակություն է որակել՝ նշելով. «Եթե ՀԷՑ-ում աուդիտ լինի, կեղտերը լույս աշխարհ կգան: Ես մազաչափ չեմ կասկածում, որ պարտադրել են Ռոբերտ Նազարյանի հանձնաժողովին»,-ընդգծել է նա ու հավելել. «Եթե աուդիտը լինի, միանգամից այս կեղտերը լույս աշխարհ կգան»:
Սադոյանի համոզմամբ՝ եթե աուդիտի ձեւավորման կարգն ցուցարարներին ու հանրությանը դուր չգա, նորից կհավաքվեն:
Հունիսի 22-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը: Հունիսի 28-ին ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում։ Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: