Բելառուսի եւ Հայաստանի միջեւ առեւտրական հարաբերությունները չեն համապատասխանում հնարավորություններին։ Այս մասին այսօր՝ հունիսի 28-ին, հայտարարել է Բելառուսի Ազգային ժողովի Ներկայացուցիչների պալատի նախագահ Վլադիմիր Անդրեյչենկոն ՀՀ Ազգային ժողովի փոխխոսնակ Էդուարդ Շարմազանովի հետ հանդիպման ընթացքում, փոխանցում է «ԲԵԼՏԱ»-ն։

«Մեր երկրների առեւտրական հարաբերությունները վերջին ժամանակներս չեն համապատասխանում մեր հնարավորություններին»,- նշել է Անդրեյչենկոն եւ հիշեցրել, որ 2014թ. երկու երկրների միջեւ ապրանքաշրջանառությունը կազմել է 38.6 մլն դոլար, ինչը, 2013թ. հետ համեմատ, 3.8 տոկոսով քիչ է։ «Այս տարվա սկիզբը նույնպես չի ուրախացնում։ Մենք համագործակցելու շատ ոլորտներ ունենք՝ գյուղատնտեսությունը, տեխնիկայի մատակարարումը, արդյունաբերական ձեռնարկություններ հիմնելը»,-ասել է Վլադիմիր Անդրեյչենկոն։

Բելառուսի խորհրդարանի խոսնակը նշել է, որ թեեւ Բելառուսի եւ Հայաստանի խորհրդարանական պատվիրակությունները համագործակցում են միջազգային կազմակերպություններում, այսուհետ պետք է ամրապնդել նաեւ համագործակցությունը խորհրդարանների մակարդակով։

Իր հերթին Էդուարդ Շարմազանովը նշել է, որ հայկական կողմը կարեւորում է Բելառուսի հետ հարաբերությունների զարգացումը եւ համաձայնվել է այն կարծիքի հետ, որ երկու երկրների խորհրդարանները պետք է դրա համար անեն հնարավոր ամեն բան։