Ծննդատանը կնոջը հրազենային ծանր վնասվածք հասցրած եւ ինքնասպան եղած տղամարդը մոտ 5-6 ամիս է չէր մեկնում արտագնա աշխատանքի:

Մեզ հասած տեղեկություններով, ամուսինները երկու տարի երեխա չէին ունենում եւ հիմա լույս աշխարհ է եկել նրանց առաջնեկը: Ասում են, թե տղամարդը հոգեկան խնդիրներ է ունեցել, հնարավոր է, հենց այդ հողի վրա էլ կատարել է սպանության փորձն ու ինքնասպանությունը:

Այս պահին կնոջը վիրահատում են, նրա վիճակը ծայրահեղ ծանր է: Պերինատոլոգիայի, մանկաբարձության եւ գինեկոլոգիայի կենտրոնում է առողջապահության նախարար Արմեն Մուրադյանը:

Մեր տեղեկություններով, բժիշկներին հաջողվել է կտրել արյունահոսությունը, հհամակարգչային տոմոգրաֆիական հետազոտություն է իրականացվում:

Բժիշկների խոսքով՝ ամուսինը նորմալ արտաքինով ու հագուստով երիտասարդ էր, ոչ մի կասկածելի վարք չի դրսեւորել:

Ավելի վաղ NEWS.am-ը հայտնել էր, որ Երեւանի Պերինատոլոգիայի, մանկաբարձության եւ գինեկոլոգիայի կենտրոնում այսօր՝ հունիսի 30-ին արտակարգ դեպք է գրանցվել: Ամուսինը եկել է հիվանդանոց, կրակել ժամեր առաջ կեսարյան հատմամբ ծննդաբերած կնոջը, ապա ինքնասպան եղել:

Մեզ հաջողվեց պարզել, որ նրանք ապրում են Դավիթաշենում, կինը՝ 27-ամյա Միլենա Ա.-ն ծննդաբերել է հղիության 8-րդ ամսում: Ամուսինը՝ 33-ամյա Հայկ Վ.-ն գալով հիվանդանոց տեսել է զոքանչին եւ հարազատներին այնտեղ, ապա նրանց ուղարկել է բուլկի գնելու եւ կրակել կնոջ պարանոցին: Նոր ծննդաբերած կնոջ վիճակը ծայրահեղ ծանր է:

Մեզ հասած տեղեկություններով ամուսինը զբաղվում էր արտագնա աշխատանքով:

Ոստիկանությունից NEWS.am-ին հայտնեցին, որ ահազանգը ստացվել է 10.15-ին, օպերատիվ խումբը դեպքի վայրում է: