ԼՂՀ կառավարության աշխատակազմի ղեկավար- նախարար Լեւոն Գրիգորյանի ներկայացմամբ, այսօր՝ հունիսի 30-ին, ԼՂՀ Ազգային ժողովի արտահերթ նստաշրջանում ի թիվս օրակարգային այլ հարցերի, քննարկվել է «Լեռնային Ղարաբաղի Հանրապետության կառավարության կառուցվածքի մասին» ԼՂՀ օրենքի նախագծի մասին հարցը, որով կադրային եւ կառուցվածքային փոփոխություններ են նախատեսվում կառավարությունում:
Կառավարության պաշտոնական ներկայացուցիչ Լ. Գիգորյանի խոսքով, նախագծի նպատակը պետական կառավարման ապարատի պահպանման ծախսերի եւ օպտիմալացման միջոցով տնտեսված միջոցները ծրագրային զարգացման գլխավոր ուղղություններին նպատակաուղղելն է:
Նախագծով սահմանված փոփոխությունների համաձայն ԼՂՀ կառավարությունում կգործեն առողջապահության, արդարադատության, աշխատանքի եւ սոցիալական հարցերի, արտաքին գործերի, գյուղատնտեսության, էկոնոմիկայի, կրթության, գիտության եւ սպորտի, մշակույթի եւ երիտասարդության հարցերի, պաշտպանության, քաղաքաշինության, ֆինանսերի նախարարություններ , ինչպես նաեւ կառավարությանն աշխատակազմի ղեկավար նախարար: Կառավարությանն առընթեր կգործեն Ազգային անվտանգության եւ Արտակարգ իրավիճակների պետական ծառայությունները, Շրջակա միջավայրի եւ բնական ռեսուրսների վարչությունը եւ ԼՂՀ Ոստիկանությունը:
Նախագիծը գլխադասային հանձնաժողովի դրական եզրակացությամբ Ազգային ժողովում ընդունվեց 22 կողմ եւ 7 ձեռնպահ ձայների հարաբերակցությամբ: