Թեհրանը ձգտում է միջուկային ծրագրի շուրջ համաձայնության հասնել «վեցյակի» հետ (ՄԱԿ-ի ԱԽ մշտական անդամներ եւ Գերմանիա), բայց պատրաստ չէ դրա համար ցանկացած գին վճարել: Այս մասին Press TV հեռուստաալիքի եթերում հայտարարել է Իրանի ԱԳ նախարարի տեղակալ Աբբաս Արակչին:
«Վիեննայի բանակցություններում բոլոր պատվիրակությունները, այդ թվում՝ իրանականը, ապագա համաձայնագրի տեքստի ուղղությամբ աշխատում են շատ լուրջ եւ դրական մթնոլորտում: Առաջընթացի ոգի կա: Միաժամանակ, դա չի նշանակում, որ բոլոր պատվիրակությունները, այդ թվում՝ մերը, պատրաստ են ցանկացած գնով համաձայնության հասնել»,- ասել է Արակչին:
ՏԱՍՍ գործակալության փոխանցմամբ, նա նաեւ հավելել է, որ Իրանի համար լավ գործարք կլինի այն, որը կհարգի երկրի ղեկավար այաթոլլա Ալի Խամենեիի նշած սկզբունքներն ու շրջանակները:
Նշելով, որ բանակցությունները եւս 7 օրով երկարաձգվել են, Արակչին հույս է հայտնել, որ այդ ընթացքում համաձայնություն ձեռք կբերվի:
Ավելի ուշ ԱՄՆ պետքարտուղար Ջոն Քերրին տեղեկացրել է, որ բանակցություններում առաջընթաց կա, չնայած վերջնական համաձայնության հասնելու ճանապարհին դեռեւս բարդ հարցեր կան:
«Մենք շատ լարված ենք աշխատում: Շատ բարդ հարցեր կան, բայց մենք հավատում ենք, որ առաջընթաց կա: Այդ պատճառով էլ շարունակում ենք աշխատել»,- հայտարարել է ամերիկյան դիվանագիտության ղեկավարը:
