Ռուսաստանի Դաշնության տրամադրած պետական արտահանման վարկից ոչ մի ցենտ, ոչ մի լումա չի կարող ծախսվել այլ կարիքների համար։ Այս մասին հուլիսի 2-ին Ազգային ժողովում հայտարարեց ՀՀ պաշտպանության փոխնախարար Արա Նազարյանը՝ պատասխանելով ՀԱԿ խմբակցության ղեկավար Լեւոն Զուրաբյանի այն հարցին, թե հնարավո՞ր է արդյոք, որ տրամադրվող գումարը ծախսվի էլեկտրաէներգիայի սակագնի բարձրացումը փոխհատուցելու վրա, որի բեռն իր վրա է վերցրել Կառավարությունը։
«Ուզում եմ եւս մեկ անգամ ընդգծել, որ գումարը տրամադրվել է միայն ռուսական արտադրության զինամթերք գնելու համար։ Հետեւաբար վստա՛հ եղեք, որ ոչ մի կոպեկ չի ծախսվի այլ կարիքների համար, հատկապես այն նպատակով, որը Դուք նշեցիք»,- վստահեցրեց փոխնախարարը։ Զուրաբյանն իր հերթին հայտարարեց, որ, ի դեմս Նազարյանի, ինքը չի վստահում իշխանություններին եւ լրացուցիչ երաշխիքներ պահանջեց, որ գումարը չի ծախսվի էլեկտրաէներգիայի պարտքը մարելու վրա։ «Դուք իրավունք ունեք չհավատալ։ Դա ձեր գործն է։ Ցուցակում ներկայացված է առաջիկա գնումների թիվը»,- պատասխանեց Նազարյանը։
Վիճաբանությանը միջամտեց ԱԺ խոսնակ Գալուստ Սահակյանը՝ նշելով, որ ցուցակը տրամադրվել է բոլոր պատգամավորներին, սակայն քանի որ դա գաղտնի տեղեկություն է, ապա չի բարձրաձայնվի, ուստի խորհուրդ է տալիս Զուրաբյանին բավարարվել այդ տեղեկությամբ։
