Շիրակի մարզի Մարալիկ քաղաքի Հրանտ Շահինյան փողոցի թիվ 1 հասցեում` գազալցակայանը, որտեղ պայթյուն է եղել, 2014թ սեպտեմբերին է անցել փորձաքննություն: Այս մասին NEWS.am-ի թղթակցի հետ զրույցում ասաց , Տարածքային կառավարման և արտակարգ իրավիճակների նախարարության «Տեխնիկական անվտանգության ազգային կենտրոն» ՊՈԱԿ տնօրենի տեղակալ Վլադիմիր Հովսեփյանը:
Նա նշեց, որ այժմ ստեղծվել է հանձնաժողով, որը ուսումնասիրում է պայթյունի պատճառները: «Մեքենա չի պայթել, նախնական տեղեկություններով՝ պոկվել է կոմպրեսատորի փականը, քանի որ նոր են հրդեհը մարել, դեռ հստակ չեն կարողանում տեսնել, թե ինչից է: Տեխնիկական քննություն կանեն, պատճառները կիմանան»,-ասաց Վլադիմիր Հովսեփյանը:
Ավելի վաղ հայտնել էինք, որ Հայաստանի ԱԻՆ-ում՝ հուլիսի 3-ին, ժամը 14.35-ին ահազանգ է ստացվել, որ Շիրակի մարզի Մարալիկ քաղաքի Հրանտ Շահինյան փողոցի թիվ 1 հասցեում` գազալցակայանում, տեղի է ունեցել պայթյուն, կան տուժածներ: Դեպքի վայր է մեկնել օպերատիվ խումբ: Պարզվել է, որ Հրանտ Շահինյան փողոցի թիվ 1 հասցեում գտնվող «Անի-Մարալիկ» ՍՊԸ-ին պատկանող գազալցակայանի կոմպրեսորային հատվածում` պայթել է նստվածքների կուտակման բալոնը, ինչից 52-ամյա Բ. Մ.-ն եւ 67-ամյա Ա. Մ.-ն տարբեր աստիճանի մարմնական վնասվածքներով տեղափոխվել են Գյումրի քաղաքի ԲԿ: Տուժածներից մեկը դուրս է գրվել, մյուսին տեղափոխել են Երեւան: