Իրանն ու միջազգային միջնորդների «վեցյակը» պայմանավորվել են ուրանը Ռուսաստան տանելու մասին: Այս մասին ՏԱՍՍ գործակալությանը տեղեկացրել է իրանական պատվիրակության դիվանագիտական աղբյուրը:
Կողմերի միջեւ ապրիլին Լոզանում համաձայնեցված ապագա պայմանագրի քաղաքական չափորոշիչները ենթադրում են, որ հարստացված ուրանի պաշարներն Իսլամական Հանրապետության տարածքում զգալիորեն պետք է սահմանափակվեն: Ենթադրվում է, որ ավելորդ պաշարները Թեհրանն արտերկիր է փոխադրելու:
Բացի այդ, Իրանը պարտավորվելու է երկրի տարածքից դուրս բերել կամ արտաքին շուկայում վաճառել ծանր ջրի պաշարները, որոնք անհրաժեշտ չեն Արակի ռեակտորի աշխատանքի համար:
Ավելի ուշ ֆրանսիական պատվիրակության ներկայացուցիչը լրագրողներին տեղեկացրել է, որ նախարարական նոր հանդիպումը սպասվում է հուլիսի 5-ին:
«Մեր նախարար Լորան Ֆաբիուսն ավստրիական մայրաքաղաք կվերադառնա հուլիսի 5-ին, եւ մենք գիտենք, որ նրա եվրոպական որոշ գործընկերներ նույնպես կժամանեն»,- հավելել է աղբյուրը: