Շիրակի մարզի Մարալիկ քաղաքի գազալցակայանում այսօր` հուլիսի 3-ին տեղի ունեցած պայթյունից տուժած 52-ամյա Բաբկեն Մակարյանին հետազոտել են Երեւանի «Սուրբ Գրիգոր Լուսավորիչ» ԲԿ-ում, նրա վիճակը լավ է: Այս մասին NEWS.am-ի հետ զրույցում ասացին տուժածի հարազատները:
Նրանք նշեցին, որ պայթյունի հետեւանքով Բաբկեն Մակարյանի թոքերում օդ է հավաքված եղել: Նա Երեւանում բուժօգնություն է ստացել: Բաբկեն Մակարյանը հիվանդանոցում կմնա եւս մի քանի օր:
Նշենք, որ Բաբկեն Մակարյանը եւ պայթյունից տուժած մյուս տղամարդը` Արշակ Մանուկյանը, Մարալիկի բնակիչներ էին, աշխատում էին գազալցակայանում, որտեղ տեղի է ունեցել պայթյունը: Արշակ Մանուկյանը Գյումրիի ԲԿ-ում բուժօգնություն է ստացել եւ դուրս գրվել:
Հիշեցնենք, որ այսօր Շիրակի մարզի Մարալիկ քաղաքի Հրանտ Շահինյան փողոցի թիվ 1 հասցեում գտնվող, «Անի-Մարալիկ» ՍՊԸ-ին պատկանող գազալցակայանի կոմպրեսորային հատվածում պայթել էր նստվածքների կուտակման բալոնը, ինչի հետեւանքով 52-ամյա Բաբկեն Մակարյանն ու 67-ամյա Արշակ Մանուկյանը տարբեր աստիճանի մարմնական վնասվածքներով տեղափոխվել էին Գյումրիի ԲԿ: