Աշոցքում էլեկտրական ցանցի աշխատակցի կողմից հրազենային վնասվածք ստացած աշակերտուհին դեռ գտնվում է հիվանդանոցում: Այս մասին NEWS.am-ի թղթակցի հետ զրույցում ասաց Աշոցքի գյուղապետ Արթուր Ալոյանը:
Նա նշեց, որ աղջկա մարմնից բեկորները հեռացրել են, մնացել է մի փոքր կտոր, որ հանեն, վիճակը լավ է, առաջիկա շաբաթվա ընթացքում նրան դուրս կգրեն: Գյուղապետն ասաց, որ դեպքից մանրամասներ չգիտի, քանի որ այժմ գյուղում չէ, բայց լսել է, որ պատահականություն է եղել, էլցանցի աշխատակիցը կրակելիս է եղել ծառի ուղղությամբ, դիպել է երեխային: Գյուղապետը Ճանաչում է էլցանցի աշխատակցին եւ նշեց, որ նա սովորական նորմալ մարդ է, ամուսնացած է, ունի երկու որդի: Տուժած դպրոցականն էլ քույր ու եղբայր ունի:
Մեզ չհաջողվեց կապ հաստատել հիվանդանոցի հետ, վիրավոր աղջկա առողջական վիճակի մասին տեղեկատվություն ստանալու համար:
Ավելի վաղ հայտնել էինք, որ Շիրակի մարզում էլեկտրական ցանցի օպերատորը կրակել է 12-րդ դասարանի աշակերտուհուն: NEWS.am-ի տեղեկություններով՝ հուլիսի 2-ին «Տիրամայր Նարեկ» հիվանդանոցից հաղորդում է ստացվել այն մասին, որ «աջ ազդրի վերին 1/3-ի, ստորին 1/3-ի, սրունք թաթային հոդի ներսային մակերեսի և ձախ ազդրի 1/3-ի ներսային մակերեսի հրազենային կոտորակային վերքեր» ախտորոշմամբ իրենց մոտ բուժօգնության է տեղափոխվել Աշոցքի միջնակարգ դպրոցի 12-րդ դասարանի աշակերտուհին: Պարզվել է, որ 17-ամյա աղջկան այդ վնասվածքը անզգուշությամբ պատճառել է էլեկտրական ցանցի օպերատոր Արմեն Ս.-ն: Մեզ հայտնի է դարձել, որ էլցանցի աշխատակիցը ողորկափող որսորդական հրացանից փորձել է կատվին կրակել, սակայն պատահաբար դիպել է աղջկան: Աղջկան տրվել է դատաբժշկի ուղեգիր, նշանակվել է դատաձգաբանական փորձաքննություն: Դեպքի առթիվ նյութեր են նախապատրաստվում: