Երեւանում հուլիսի 8-12-ին տեղի կունենա Ցեղասպանագետների միջազգային ընկերակցության 12-րդ գիտական կոնֆերանսը, որի թեման է. «20-րդ դարի ցեղասպանությունների համեմատական վերլուծությունը»:

Այսօր՝ հուլիսի 7-ին, լրագրողների հետ հանդիպման ժամանակ Ցեղասպանության թանգարան ինստիտուտի տնօրեն Հակ Դեմոյանը հայտարարել է, որ Երեւանում կոնֆերանսի անցկացումը շատ կարեւոր է մի քանի տեսանկյունից: «Մենք այս տարի շարունակում ենք միջոցառումները բոլոր ոլորտներում՝ մշակութային, ակադեմիական, որոնք այս կամ այն կերպ առնչվում են Հայոց ցեղասպանության 100-րդ տարելիցին: Հաշվի առնելով գիտական ասպեկտը, անհրաժեշտ է նշել, որ դա բավական ներկայացուցչական եւ մեծ կոնֆերանս է, սպասվում է 130 զեկույց»,-ընդգծել է Դեմոյանը:

Նրա խոսքով, նման գիտական կոնֆերանս Հայաստանում երբեք չի եղել, առնվազն, ցեղասպանագիտության եւ Հայոց ցեղասպանության ուսումնասիրության ոլորտում: «Կոնֆերանսը ընթացքում մենք կանդրադառնանք ոչ միայն Հայոց ցեղասպանությանը, այլեւ կփորձենք խոսել 20-րդ դարի բոլոր ցեղասպանությունների մասին, փորձելով ներկայացնել դրանց համեմատական վերլուծությունը»,-նշել է Դեմոյանը:

Նա հիշեցրել է, որ Ցեղասպանագետների միջազգային ընկերակցությունը դեռեւս 15 տարի առաջ հատուկ հայտարարություն է ընդունել, որով Հայոց ցեղասպանությունը ճանաչել է որպես պատմական փաստ, որը կարիք չունի վերանայման գիտական տեսանկյունից: