Ադրբեջանա-ղարաբաղյան հակամարտության քաղաքական կարգավորման հարցերը ՄԻԵԴ-ի իրավասությունների շրջանակներում չեն, ինչի մասին միանշանակ կերպով նշված է նաեւ դատարանի որոշումների մեջ։ Այս մասին հայտարարել է ԼՂՀ ԱԳ նախարար Կարեն Միրզոյանը՝ karabakh-open.info-ին տված հարցազրույցում:
Անդրադառնալով «Չիրագովը եւ ուրիշներն ընդդեմ Հայաստանի» եւ «Սարգսյանն ընդդեմ Ադրբեջանի» գործերով ՄԻԵԴ-ի վճիռների վերաբերյալ հարցին Միրզոյանը նշել է. «Ադրբեջանի փորձերը՝ շահարկել ՄԻԵԴ-ի վճիռը, զուրկ են տրամաբանությունից եւ լիովին համահունչ են վերջինիս կողմից որդեգրած քաղաքականությանը՝ բոլոր հնարավոր միջոցներով խեղաթյուրելու ադրբեջանա-ղարաբաղյան հակամարտության էությունն ու խոչընդոտելու հակամարտության լուծմանն ուղղված ջանքերը։
Անհրաժեշտ ենք համարում նշել, որ ադրբեջանա-ղարաբաղյան հակամարտության քաղաքական կարգավորման հարցերը ՄԻԵԴ-ի իրավասությունների շրջանակներում չեն, ինչի մասին միանշանակ կերպով նշված է նաեւ դատարանի որոշումների մեջ։ Հետեւաբար, դատարանի վճիռը բանակցային գործընթացի ենթատեքստում դիտարկելու փորձերը զուրկ են որեւէ հիմնավորումից։ ՄԻԵԴ-ի որոշումը վերաբերում է, բացարձակապես, անհատական առաջին հերթին՝ գույքային իրավունքների իրավական պաշտպանությանը»:
Նրա խոսքով, նշված վճիռները կրկին արդիական են դարձրել փախստականների եւ տեղահանված անձանց խնդիրը։ «Այն ադրբեջանա-ղարաբաղյան հակամարտության կարգավորման գործընթացի բաղկացուցիչ մասն է եւ ի հայտ է եկել Արցախի ժողովրդի ինքնորոշման իրավունքն ուժով ճնշելու ադրբեջանական իշխանությունների փորձերի արդյունքում ծագած հակամարտության հետեւանքով։
Ադրբեջանը համառորեն անտեսում է, որ ՄԻԵԴ-ը զուգահեռաբար քննում էր նաեւ «Սարգսյանն ընդդեմ Ադրբեջանի» գործը, որի դեպքում նույնպես դրական վճիռ է կայացրել։ Կարծում եմ, դրանով ՄԻԵԴ-ը ցույց է տվել, որ ադրբեջանա-ղարաբաղյան հակամարտության արդյունքում տեղահանված անձանց փոխհատուցման հարցը պետք է լուծվի փոխադարձության եւ հավասարության սկզբունքների հիման վրա»,-ընդգծել է ԼՂՀ ԱԳ նախարարը:
Կարեն Միրզոյանը եւս մեկ անգամ հայտարարել է, որ ԼՂՀ-ն ի տարբերություն Ադրբեջանի մշտապես հանդես է եկել հավասարության, փոխադարձության եւ արդարության սկզբունքների հիման վրա փախստականների խնդիրների լուծման օգտին։ «Ադրբեջանական իշխանությունների կողմից իրականացվող խտրական քաղաքականությունը՝ հավաքական պատժի ենթարկելու ԼՂՀ-ում բնակվող հայ փախստականներին՝ զրկելով նրանց միջազգային պաշտպանությունից ու օգնությունից, հակասում է փոխադարձության, արդարության եւ մարդկանց հավասարության սկզբունքին:
Մասնագիտացված կազմակերպությունների, մասնավորապես, ՄԱԿ-ի փախստականների հարցերով գերագույն հանձնակատարի՝ ԼՂՀ այցին խոչընդոտող Ադրբեջանի իշխանությունների ապակառուցողական դիքորոշման հետեւանքով, Լեռնային Ղարաբաղում բնակվող փախստականները զրկված են միջազգային պաշտպանությունից եւ աջակցությունից։ Ադրբեջանական իշխանություններն այդպիսով շարունակում են խախտել տվյալ կատեգորիայի անձանց հիմնարար իրավունքները»,-ամփոփել է իր խոսքը ԼՂՀ արտաքին գերատեսչության ղեկավարը:
