Գավառ քաղաքում վերաբացվել է «Սեւան» հանքային ջրի գործարանը: Բացման արարողությանը ներկա է եղել ՀՀ նախագահ Սերժ Սարգսյանը:
Ինչպես լրագրողներին հայտնեց նախագծի հիմնադիր Միսակ Բալասանյանը, գործարանի հզորությունը պլանավորվում է հասցնել տարեկան մինչեւ 20-25 մլն շիշ արտադրության: Նախնական փուլում արտադրվում է տարեկան 5 մլն շիշ:
«Սեւան» գործարանը հիմնվել էր 1953թ. : Մինչեւ 1962թ. այն տարեկան արտադրում էր մոտ 150 հազար շիշ հանքային ջուր: 1970-1980-ական թթ. արտադրության ծավալները կազմում էին տարեկան 5 մլն շիշ: Գործարանը փակվել էր 1992թ.: 2010թ. այն ձեռք էր բերել Բալասանյան ընտանիքը (Միսակ Բալասանյանը Գյումրիի քաղաքապետի եւ Գյումրիի գարեջրի գործարանի սեփականատաեր Սամվել Բալասանյանի որդին է):
Բալասանյան կրտսերը նշել է, որ այս հանքային ջրի գործարանի արտադրանքը տարբերվում է մյուսներից նրանով, որ գրեթե չի պարունակում մկնդեղ:
Ընկերությունը պլանավորում է արտադրանքը իրացնել տեղական շուկայում եւ արդեն այս ամիս մոտ 20 հազար շիշ արտահանել Ռուսաստան եւ Վրաստան:
2010-2015թթ. գործարանում ներդրումների ծավալը կազմել է 1.9 մլրդ դրամ, իսկ 2016թ. պլանավորվում է ներդնել եւս 300 մլն՝ պոլիէթիլենային շշերի հոսքագծի համար:
Գործարանում աշխատում է մոտ 80 մարդ: Հետագայում պլանավորվում է այդ թիվը հասցնել 180-ի: