Սահմանադրական բարեփոխումների մասնագիտական հանձնաժողովն այսօր՝ հուլիսի 13-ին, ժամը 17.00-ին նիստ է գումարելու, որի ժամանակ պետք է քննարկվի Սահմանադրության 1-7-րդ գլուխներին հավանություն տալու հարցը: Այս մասին NEWS.am-ի թղթակցի հետ զրույցում ասաց ՍԴ բարեփոխումների մասնագիտական հանձնաժողովի անդամ, ԵՊՀ իրավագիտության ֆակուլտետի դեկան Գագիկ Ղազինյանը:
Նա նշեց, որ այդ 7 գլուխները ներկայացվելու են հանրությանը մինչեւ հուլիսի 15-ը: Սահմանադրության նախագիծն ամբողջությամբ նախատեսվում է ավարտել մինչեւ օգոստոսի սկիզբը: Դրանից հետո այն պետք է ներկայացվի նախագահին, հավանության արժանանալու դեպքում՝ ներկայացվի ԱԺ, այնուհետեւ նոր նշանակվի հանրաքվեի օր: Այդ ընթացքում նախատեսվում է անցկացնել քաղաքական եւ մասնագիտական քննարկումներ: Ինչ վերաբերում է հանրաքվեի մոտավոր ժամկետներին, Գագիկ Ղազինյանն ասաց, որ դա ոչ իր, ոչ էլ հանձնաժողովի լուծելիք խնդիրը չէ: