Ամերիկյան Նյու Մեքսիկո նահանգի եւ նախկին խորհրդային պետություն Ադրբեջանի միջեւ շուրջ 7.000 մղոն տարածություն կա, բայց դա չի խանգարում ավելի ու ավելի շատ կուլիսային քաղաքական մերձեցման, որը լրացվում է նահանգի Կապիտոլիումի հնարքներով եւ Ադրբեջան օրենսդիրների այցելությունները, ինչը քննդատություն է հրահրում եւ Նյու Մեքսիկոյին ներգրավում տարածաշրջանային վաղեմի թշնամության մեջ: Այս մասին գրում է տեղական «Albuquerque Journal» պարբերականը:
Հոդվածի համաձայն, նահանգի բարձրաստիճան մի օրենսդիր, որը վերջին տարիներին Ադրբեջան այցելած պաշտոնական պատվիրակությունների կազմում է եղել, պնդում է, որպեսզի վճարովի այցերը ճանաչողական բնույթ կրեն, եւ որպեսզի իրենց չստիպեն փոխարենը որեւէ բան տալ:
Սակայն վերջին երեք տարիներին Նյու Մեքսիկոյի օրենսդիրները հավանության են արժանացրել երաշխավորական հուշագրերը, որոնցում բարձր են գնահատվում Ադրբեջանի արժանիքներն ու մահմեդական մեծամասնությամբ աշխարհի պետության եւ ամերիկյան նահանգի միջեւ կապերը: Այդ հուշագրերի մեծ մասը միաձայն հավանության է արժանացել, առանց հատուկ բանավեճերի:
«Չնայած հուշագրերն իրավաբանական ուժ չունեն, դրանց պատճեններն ուղարկվել են նախագահ Բարաք Օբամային, Ադրբեջանում ԱՄՆ դեսպանին եւ ընտրովի եւ նշանակովի այլ պաշտոնյաների: Ամեն դեպքում, Ադրբեջանը բազմաթիվ քննադատներ ունի: Լրագրողների պաշտպանության հանձնաժողովը վերջերս Ադրբեջանին ներառել է աշխարհում ամենակոշտ գրաքննությունն ունեցող 10 երկրների ցանկում՝ Հյուսիսային Կորեայի, Սաուդյան Արաբիայի, Չինաստանի, Իրանի եւ այլ պետությունների հետ միասին»,- գրում է ամերիկյան պարբերականը՝ հավելելով, որ Նյու Մեքսիկոն միայնակ չէ Ադրբեջանի ուշադրությանն արժանանալու հարցում, որը տարբեր բանաձեւեր եւ հուշագրեր է առաջ մղում ավելի քան 30 նահանգներում:
Նախկինում էլ «The Washington Post»-ը գրել էր, որ ԱՄՆ Ներկայացուցիչների պալատի անդամ Լուհան Գրիշամը՝ նույնպես Նյու Մեքսիկոյից, 10 անդամից կազմված Կոնգրեսի պատվիրակության կազմում մեկնել է Ադրբեջան՝ մասնակցելու մի համաժողովի, որի անցկացումը գաղտնի կերպով ֆինանսավորել է երկրի պետական նավթային ընկերությունը: Ալբուքերքեից այդ դեմոկրատը քննիչներին ասել էր, որ կարծել է, թե ուղեւորությունը ֆինանսավորվում է ոչ կոմերցիոն խմբերի կողմից, եւ չի մտածել, որ նվեր ստացած ադրբեջանական գորգերն արժեքավոր են կամ գրավիչ: Բացի այդ, ուղեւորությունից առաջ նա Ներկայացուցիչների պալատի էթիկայի հանձնաժողովի հավանությունն է ստացել: Վերադարձից հետո Լուհան Գրիշամը եւ նրա գործընկերներից մի քանիսը համապատասխան հարցաթերթիկներում ոչինչ չեն նշել ստացած գորգերի մասին: