Հանրապետության ներկայիս էներգետիկ անվտանգության մակարդակը պահպանելու նպատակով Հայաստանի Հանրապետությունը շարունակելու է զարգացնել ատոմային էներգետիկան: Այս մասին այսօր՝ հուլիսի 22-ին, «ՀՀ էներգետիկ համակարգի երկարաժամկետ (մինչև 2036թ.) զարգացման ուղիները» խորագրով ծրագրի շնորհանդեսի ժամանակ հայտարարել է ՀՀ վարչապետ Հովիկ Աբրահամյանը:
«Այդ նպատակով մենք ՀԱԷԿ-ի երկրորդ էներգաբլոկի շահագործման նախագծային ժամկետը 10 տարով երկարաձգելու մասին որոշում ենք կայացրել: Այժմ այդ ուղղությամբ իրականացվում են համապատասխան աշխատանքներ, ստորագրվել է անհրաժեշտ ֆինանսական համաձայնագիրը, որը վավերացվել է նաև ՀՀ Ազգային ժողովի կողմից: Միևնույն ժամանակ, շարունակվում են բանակցությունները հնարավոր ներդրողների հետ ՀՀ-ում նոր միջուկային էներգաբլոկի կառուցման ծրագրի իրականացման համար»,,-ասել է նա:
Վարչապետի խոսքով, էներգաբլոկը աշխատանքային վիճակում պահպանելու համար ֆինանսական համաձայնագիր է կնքվել Ռուսաստանի հետ (270 մլն դոլարի վարկ եւ 30 մլն դոլաի դրամաշնորհ): Համաձայնագիրն արդեն Հայաստանի ԱԺ-ն վավերացրել է:
Հայկական ԱԷԿ-ի վերանորոգումը կսկսվի 2017-ին, որը կարող է երկարաձգել նրա գործողության ժամկետը մինչեւ 2026 թվականը: Մինչ այդ շահագործման կհանձնվի նոր էներգաբլոկը, որի շինարարությունը կսկսվի 2018-ին: