ԵԱՀԿ Մինսկի խմբի համանախագահները ողջունել են Հայաստանի եւ Ադրբեջանի նախագահների՝ այս տարի հանդիպելու պատրաստակամությունը: Այս մասին ասված է տարածաշրջան կատարած այցի արդյունքներով եռանախագահների տարածած հայտարարությունում:
Այցի ընթացքում համանախագահներ Ջեյմս Ուորլիքը (ԱՄՆ), Իգոր Պոպովը (Ռուսաստան) եւ Պիեռ Անդրյոն (Ֆրանսիա) հանդիպել են Հայաստանի նախագահ Սերժ Սարգսյանի եւ Ադրբեջանի նախագահ Իլհամ Ալիեւի հետ: Հանդիպումներին մասնակցել է նաեւ ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշչիկը:
Երեւան եւ Բաքու կատարած այցերի ընթացքում համանախագահները երկրների ղեկավարների հետ քննարկել են ղարաբաղյան հակամարտության կարգավորմանը հասնելու համար բանակցություններն առաջ մղելու ընթացիկ առաջարկները: «Մենք ողջունեցինք այս տարի հանդիպելու՝ նախագահների պատրաստակամությունը, եւ նրանք իրենց երկրների ԱԳ նախարարներին հանձնարարել են շարունակել աշխատել եռանախագահների հետ՝ նախագահների գագաթաժողովի օրակարգը մշակելու ուղղությամբ»,- ասված է հայտարարությունում:
Միջնորդները նաեւ ողջունել են շփման գծում եւ հայ-ադրբեջանական սահմանի երկայնքով համեմատական կայունությունը, «ինչը համընկավ տարվա վերջին ամիսներին երկու երկրներում տեղի ունեցած միջազգային խոշոր իրադարձությունների հետ»: Ամեն դեպքում, նրանք անհանգստություն են հայտնել վերջերս լարվածության աճի առիթով եւ նախագահներին կոչ են արել խուսափել բռնության սրումից եւ միջոցներ ձեռնարկել՝ հրադադարի մասին համաձայնագրին խստորեն հետեւելու համար:
Նախագահներն իրենց հերթին կրկին հաստատել են ԿԽՄԿ-ի հովանո ներքո անհետ կորածների մասին տվյալների փոխանակմանը հավատարմությունը:
Համանախագահները նաեւ այցելել են Վիեննա՝ Մինսկի խմբի անդամ-պետությունների ներկայացուցիչների հետ խորհրդակցությունների համար:
