Սահմանադրության բարեփոխումներն արվում են կառավարման համակարգի արդյունավետության բարձրացման համար։ Այսօր՝ հուլիսի 24-ին, լրագրողների հետ հանդիպմանը նման կարծիք հայտնեց ԱԺ ՀՀԿ խմբակցության պատգամավոր Արտակ Դավթյանը՝ նշելով, որ Սահմանադրության նոր նախագծի քննարկումների մեծ մասը զգայական դաշտից են եւ հիմնված ենթադրությունների վրա։
«Նոր նախագիծն առաջարկում է խորհրդարանական մեծամասնություն, իսկ բարեփոխումների կարեւորագույն նպատակներից է կառավարման խորհրդարանական համակարգի արդյունավետության բարձրացումը։ Չպետք է այնպես լինի, որ արդյունավետության բարձրացման փոխարեն ունենանք կառավարման ճգնաժամային պահեր։ Բոլորիս աչքի առջեւ Իտալիայի փորձն է. երկրի նախկին վարչապետ Բեռլուսկոնին մեկ նշանակվում էր վարչապետ, մեկ մասնակցում էր դատական գործերին։ Մենք պետք է ամեն ինչ անենք, որ ճգնաժամային պահեր չունենանք»,- ասաց Արտակ Դավթյանը։
Քննարկվող հարցին, թե ով է լինելու երկրի բանակի գերագույն գլխավոր հրամանատարը ոչ պատերազմական իրավիճակում, ՀՀԿ-ական պատգամավորը նշեց, որ դա հստակ շարադրված է. «Լինելու է վարչապետը։ Սա բավականին հստակ շարադրված է, կարծում եմ, որ տարընթերցումների տեղիք չի տալիս»։
Արտակ Դավթյանը վստահեցրեց, որ այս նախագիծը դեռ նախնական տարբերակն է, եւ այս փուլում շատ կարեւորն են քննարկումներն եւ լուծումների առաջարկություններ ներկայացնելը։
Հիշեցնենք, որ արդեն հրապարակվել են Սահմանադրության նոր նախագծի առաջին յոթ գլուխները։ Նախագծով նախատեսվում է անցում կառավարման խորհրդարանական համակարգին։
