Սահմանադրական բարեփոխումներին դեմ ԱԻՄ կուսակցությունը եւ քաղաքական այլ ուժեր հուլիսի 30-ին Մատենադարանից երթով կշարժվեն դեպի Սահմանադրական դատարան`պահանջելով դադարեցնել նոր Սահմանադրության նախագծի քննարկման գործընթացը: Այս մասին այսօր`հուլիսի 24-ին Ազատության հրապարակում հրավիրված հրապարակային քննարկման ավարտին հայտարարեց ԱԻՄ առաջնորդ Պարույր Հայրիկյանը:
Նշենք, որ այսօր Ազատության հրապարակում տեղի ունեցավ սահմանադրական բարեփոխումներին դեմ Պարույր Հայրիկյանի հրավիրած հրապարակային քննարկումը: Ազատության հրապարակում էին «Հիմնադիր խորհրդարանի» առաջնորդ Ժիրայր Սեֆելյանը եւ այլ անդամներ, քաղաքագետ Հմայակ Հովհաննիսյանը, «Ոտքի Հայաստան» քաղաքացիական նախաձեռնության խորհրդի անդամներ Դավիթ Սանասարյանն ու Անդրեաս Ղուկասյանը, «Ժառանգություն» կուսակցության փոխնախագահ Արմեն Մարտիրոսյանը: Ազատության հրապարակում ներկաները, որոնք դեմ են Սահմանադրական բարեփոխումներին, պահանջում են ոչ միայն գործընթացի դադարեցում, այլեւ երկրում համակարգային փոփոխություններ, ընդհուպ մինչեւ իշխանափոխություն:
