Հայ-ադրբեջանական սահմանին համեմատաբար հանգիստ է: Այս մասին NEWS.am-ի թղթակցին ասաց Հայաստանի պաշտպանության նախարարի մամուլի խոսնակ Արծրուն Հովհաննիսյանը:
«Գիշերը խախտումներ շատ են եղել, բարեբախտաբար զոհեր եւ վիրավորներ չունենք: Այս պահին համեմատաբար հանգիստ է»,- ասաց ՊՆ խոսնակը:
Նրա խոսքով՝ հակառակորդը կրակում է միայն հայկական դիրքերի ուղղությամբ:
Արծրուն Հովհաննիսյանն իր ֆեյսբուքյան էջում գրառում է կատարել, որում մասնավորապես ասվում է. «Կրակել են ինչպես մեծ տրամաչափի հրաձգային զենքերից, այնպես էլ 60 և 82 մմ-ոց ականանետերից: Ընդհանուր առմամբ, խախտումների քանակը գերազանցում է 160-ը: Հայկական զինուժի ստորաբաժանումները պատասխան կրակ են բացել ըստ անհրաժեշտության և հակառակորդին պատճառել կորուստներ ու վնասներ: Հայկական կողմը կորուստներ չունի: Այժմ սահմանին հարաբերական անդորր է:
Ի դեպ, ադրբեջանական քարոզչամեքենան արդեն մի քանի օր է՝ ստահոդ լուրեր է տարածում սահմանային իրավիճակի մասին: Հորդորում ենք չտրվել նման սադրանքներին եւ հիմնվել միայն հայկական կողմի պաշտոնական տեղեկատվության վրա: Մենք ադրբեջանական քարոզչության մասին ավելի մեծ կարծիք ունեինք»:
Նշենք, որ վերջին օրերին լարվածություն է նկատվում թե ղարաբաղա-ադրբեջանական շփման գծում, թե հայ-ադրբեջանական սահմանին:
