«Էլեկտրական ցանցերի» տեխնիկական կորուստները կրկին կքննարկվեն հոկտեմբերին: Այս մասին NEWS.am-ի թղթակցին տեղեկացրեց Հայաստանի Հանրային ծառայությունները կարգավորող պետական հանձնաժողովի Զարգացման եւ մոնիթորինգի վարչության ղեկավար Աբգար Բուդաղյանը:
Նրա խոսքով, անխուսափելի կորուստների հաշվարկի մեթոդը մշակել է ՀԷՑ-ը, որն անկախ փորձաքննություն է անցել եւ Հանձնաժողովի կողմից հաստատվել դեռեւս 2002 թվականին: Անցյալ տարի ՀԷՑ-ը հայտարարեց մեթոդը կատարելագործելու անհրաժեշտության մասին եւ անկախ փորձագետների հրավիրեց: Նրանց առաջարկների հիման վրա ընկերությունը նոր մեթոդ է ներկայացրել, որը ներկայում Հանձնաժողովում է:
«Ինչպես հասկանում եք, ժամանակ է հարկավոր՝ տեխնիկական մանրուքները քննարկելու համար: Հնարավոր է՝ փաստաթուղթը քննարկվի հոկտեմբերին: Այդ ընթացքում «Էլցանցեր»-ի ներկայացուցիչները կկարողանան լրացուցիչ փաստարկներ պատրաստել: Չնայած կարծում եմ, որ առանց այն էլ նրանց բավական ժամանակ ենք տվել: Կորուստների հաշվարկի մեթոդի քննարկման մասին եզրափակիչ փաստաթուղթը բաց եւ հասանելի կլինի մասնագիտական հանրության համար: Թափանցիկությունը մեզ համար կարեւորագույն պայմաններից է»,- ասաց Հանձնաժողովի ներկայացուցիչը:
Հարցին, արդյո՞ք մեթոդի վերանայումը կհանգեցնի սակագնի վերանայմանը, Բուդաղյանը պատասխանեց, որ առայժմ դրա համար նախապայմաններ չի տեսնում: «Իհարկե, ամեն ինչ պարզ կդառնա աշխատանքների ավարտին, բայց առայժմ կարելի է ոչ թե պնդել, այն ենթադրել, որ փոփոխություններն այդքան զգալի չեն լինի, քանի որ հաշվարկը կառուցվում է ֆիզիկայի օրենքների հիման վրա: Իսկ դրանք, բնականաբար, նույնն են բոլորի համար»,- ամփոփեց Բուդաղյանը:
Նկատենք, որ «Հայաստանի Էլցանցեր»-ում էլեկտրաէներգիայի տեխնիկական կորուստները 2014 թվականին կազմել են 12.9%՝ հաստատված 11.2% նորմատիվի պարագայում: Անկախ փորձագետների վերլուծության հիման վրա ընկերությունն առաջարկում է նորմատիվ սահմանել 12.4%-ը: