Սահմանադրական բարեփոխումների նախագծով փորձ է արվում ավելի շատ լիազորություններ տալ վարչապետին։ Այս մասին հուլիսի 28-ին կայացած մամուլի ասուլիսի ժամանակ հայտարարել է Հայաստանի դեմոկրատական կուսակցության նախագահ Արամ Սարգսյանը։
Անդրադառնալով իշխող Հանրապետական կուսակցության՝ իշխանությունը վերարտադրելու ձգտմանը՝ նա նշեց, որ ցանկացած համակարգում, եթե բոլոր բարեփոխումները թղթի վրա մնան, իհարկե խախտումների հնարավորություն կա։ «Իհարկե ՀՀԿ-ն վերարտադրվելու ցանկություն ունի։ Նրանք հայտարարում են, որ դեռ երկար են քայլելու Մելիք Ադամյան փողոցով, որպեսզի ինչ-որ բանի հասնեն։ Եթե Սահմանադրությունը մնա թղթի վրա, կլինեն այն խախտելու բոլոր հնարավորությունները։ Ինչո՞վ էր վատ ներկայիս Սահմանադրությունը, ինչո՞վ այն թույլ չէր տալիս պայքարել կաշառակերության ու օլիգարխների դեմ եւ սոցիալական արդարության սկզբունք սահմանել»,- հարց է բարձրացրել Արամ Սարգսյանը։
Հարցին, թե ինչու են այդ դեպքում իշխանությունները գնում սահմանադրական բարեփոխումների, նա պատասխանեց, որ իրավիճակը որոշակիորեն փոխվել է. նախագահը չի կարող 3-րդ անգամ վերընտրվել։
