«Շանսի-Նաիրիտ» հայ-չինական ձեռնարկությունը կաուչուկ է արտադրում, սակայն վնասով։ Այս մասին հուլիսի 28-ին՝ ՀՀ խորհրդարանում կայացած հանդիպման ժամանակ, հայտարարեց ՀՀ էներգետիկայի եւ բնական պաշարների փոխնախարար Իոսիֆ Իսայանը, ով ձեռնարկության հայ համանախագահն է։ Գործարանի կապիտալում հայկական կողմի մասնաբաժինը կազմում է 40 տոկոս։
Ձեռնարկությունը գործում է 2010թ.-ից, եւ իր գործունեության գագաթնակետին էր հասել 2014թ, երբ արտադրում էր 20 հազար տոննա կաուչուկ։ Նախարարության տեղեկությունների համաձայն՝ դա կարող է կազմել ողջ Չինաստանում քլորոպրենային կաուչուկի մոտ կեսը։ Այդուհանդերձ, ստեղծման օրվանից գործարանը վնասով է աշխատում։ Պատճառները նույնն են, ինչ որ «Նաիրիտի» դեպքում՝ ինքնարժեքի եւ վաճառքի գների տարբերությունը։
Իհարկե արտադրության ծավալների հետ ինքնարժեքը նվազում էր, եւ 2014թ. մեկ տոննայի դիմաց կազմել էր 3900 դոլար, իսկ վաճառվում էր 3800 դոլարով։ «Գործարանը կարող է արդյունավետ աշխատել, եթե աշխատի 30 հազար տոննա նախագծային հզորությամբ։ Այդ ժամանակ նա կարող է մարել պարտքերը, իսկ պետությունը՝ դիվիդենտներ ստանալ»,- նշեց Իսայանը։