«Ոտքի Հայաստան» նախաձեռնության անդամները, ինչպես հայտարարել էին նախապես, այսօր հուլիսի 28–ի երեկոյան անցան անհնազանդության կտրուկ միջոցների` նախ 3 րոպեով նստեցին Տիգրան Մեծ պողոտայի` Կառավարության շենքին հարակից երթեւեկելի հատվածում, ապա`Ամիրյան–Կողբացի խաչմերուկում, որտեղից ոստիկանները նրանց քաշքշելով եւ ուժ կիրառելով դուրս բերեցին մայթ։

NEWS.am-ի թղթակիցը հաղորդում է, որ ակտիվիստները նորից փորձում են նստել Ամիրյան փողոցում, իրավիճակը լարված է, ոստիկանների եւ ակտիվիստների միջեւ անընդհատ վեճ ու հրմշտոց է բռնկվում։

Նշենք, որ շարժումը հայտարարել է, որ հուլիսի 27-ից 72-ժամյա նստացույց է սկսում։ Սակայն ոստիկանությունը նրանց թույլ չի տալիս մոտենալ հրապարակի կենտրոնի գորգին։ Ակտիվիստները գիշերել են Հանրապետության հրապարակում։ Գիշերը խաղաղ է անցել, առավոտից վերսկսվել են ակտիվիստների անհնազանդության ակցիաները։

Միաժամանակ, Վանաձորից մեկնարկել է շարժման անդամների մարզային երթը, որի մասնակիցներն իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։

Հիշեցնենք, որ «Ոտքի Հայաստան» նախաձեռնությունը հայտարարել էր, որ եթե ՀԾԿՀ-ն չեղյալ չհայտարարի էլեկտրաէներգիայի սակագնի բարձրացման մասին որոշումը, հուլիսի 27-ից բողոքի ակցիաներ են սկսելու: Նախաձեռնության անդամներն այցելելու են մարզեր, ինչպես նաեւ փողոցներ են փակելու։