Ֆրանսիական Ռեյունյոն կղզում հայտնաբերված օդանավի բեկորները «Բոինգ 777»-ինն են: Այս մասին հայտնել է ֆրանսիական BFM լրատվական հեռուստաալիքը։

Հեռուստաալիքը նշել է , որ «այս պահին պարզ չէ, արդյոք խոսքը մալայզիական անհետացած «Բոինգի» մասին է, թե մեկ ուրիշ օդանավի»։

Ավելի վաղ ԱՄՆ ավիացիայի ներկայացուցիչները, ուսումնասիրելով այդ առարկայի լուսանկարը, հայտարարել են, որ շատ հավանական է, որ այն պատկանում է անցած տարվա մարտին անհետացած օդանավին, հայտնում է ՏԱՍՍ-ը։

Բեկորը, որն ալիքները ափ էին դուրս բերել, կամ ֆլապերոն է, կամ էլ էլերոն փակիչ։ Այս տեղեկությունը հաստատել են նաեւ «Բոինգ» ընկերության աշխատակիցները՝ լուսանկարին ծանոթանալուց հետո։ Գտածոն կարող է լույս սփռել մալայզիական օդանավի առեղծվածային անհետացման վրա։ Այն ուսումնասիրելու նպատակով շտապ Ռեյունյոն կղզի են մեկնել ֆրանսիացի փորձագետները։

Մալայզիական «Բոյինգ-777»-ը անցած տարվա մարտի 8-ին դուրս էր եկել Կուալա Լումպուրից եւ ուղեւորվել Պեկին, բայց դրանից մոտավորապես երկու ժամ հետո անձնակազմի հետ կապը կորել էր, ու օդանավն անհետացել էր ռադարների էկրաններից։ Սկզբնական ժամանակաշրջանում որոնումները իրականացվում էին Հարավչինական ծովում եւ Մալաքքի նեղուցում։ Որոնման գործողություններին մասնակցել է 26 պետություն։