Ամերիկայի Միացյալ Նահանգներն ու Ֆրանսիան ամեն ինչ անելու են, որ ԵԱՀԿ Մինսկի խմբի անդամների դերը բարձրանա տարածաշրջանում, ինչպես նաեւ շփման գծում մեծածավալ ռազմական գործողություններ չսկսվեն։ Այս մասին այսօր՝ հուլիսի 30-ին, «ԼՂ հակամարտություն. Ապասառեցո՞ւմ, թե՞ բանակցությունների վերսկսում» քաղաքականության սեմինարի ժամանակ ասաց «Համաձայնություն» քաղաքական հետազոտական կենտրոնի ղեկավար Դավիթ Շահնազարյանը։
Նրա խոսքով՝ վերջին մեկ ամսվա ընթացքում աննախադեպ իրադարձություններ են տեղի ունեցել. Եթե գարնանը բազմաթիվ քաղաքական վերլուծաբաններ եւ գործիչներ խոսում էին շփման գծում լարվածության աճի մասին, ապա այժմ պատկերն այլ է։
«Անցած տարվա հուլիս-օգոստոսյան լարվածության հեղինակը Ռուսաստանն էր։ Ռուսաստանը ցանկանում էր ցույց տալ, որ հրադադարի ռեժիմը կառավարվում է հենց Մոսկվայի կողմից։
Շարունակելով վերջին մեկ ամսվա ժամանակագրությունը՝ Շահնազարյանը հիշեցրեց Ուորլիքի այցը Մոսկվա, այնուհետեւ հարցազրույցը ռուսական լրատվամիջոցներին։
«Այս հարցազրույցում դեսպանը նրբորեն ասում է. Ռուսաստանը խախտել է ռազմական հավասարակշռությունը՝ հօգուտ Ադրբեջանի։ Ըստ իս՝ բանակցային նոր գործընթաց է սկսվելու, իսկ կշեռքի նժարը Հայաստանի կողմն է»,- ավելացրեց նա։
Նշենք, որ Բաքվում Եվրոպական խաղերից հետո լարվածություն շփման գծում նորից աճել է։